Football chanchina chhiatna thleng thenkhat lawrkhawm.

1. BURNDEN PARK DISASTER : He chhiatna hi kum 1946 Marchi ni 9-a thleng a ni a, mi 33-in nunna an chan.  Bolton Wanderers leh Stoke City inkhelh tumin a ni a, stadium bang chu chimin mi thenkhat a delh a an in chil zui ta. He inkhel hi mipui 85,000 chuangin a hmunah hian an en a, mi 33 chuan nunna chan phahin mi 400 velin hliam an tuar bawk. An hunlaia stdium hi tunlai kual pup ang hi ala ni lova, Lammual ang deuh hian thutna chu awm mahse hmunawl a tam hle a mipui an leng tam. He chhiatna thlen chhan ber ni a an puh chu pawnlama mipui 20,000 vel awm, luh an phalsak tawh silohte'n bang hi lo nek chim ta ah niin an ngai.


2. THE HEYSEL DISATER : He chhiatna hi kum 1985 May ni 29-a thleng a ni a, fans inkar buaina vang a ni. Kum 1985 European Cup Final chu Liverpool leh Juventus-in Heysel stadium-ah hian an khel dawn a, he stadium hi a hlui tawh a kum 1930-a sak tawh kha a ni. Inkhelh tan hma darkar khat vel la awmah Liverpool fans thenkhatte chuan  Juventus fans-te nen an in daidanna bang (fence) chu tichhiain an bei chiam mai a ni. Mi  39-in nunna an chan a, mi 100 chuangin hliam an tuar bawk. Juventus fans-te thinrim chu Police-te nen in beiin fans-ho hian lung leh bottle an hmang. An buaina vang hian inkhel an thulh phah lova Juventus 1-0 in an chak. he chhiatna hi UEFA history-a, 'Hun thim ber' tih a ni.

3. ORKNEY DISASTER : He chhiatna hi chu kum 1991 January ni 13-a thleng a ni thung. South Africa rama Orkney (Oppenheimer Stadium)-ah niin  Kaizer Chiefs leh Orlando Pirates an inkhel a, Pirates fans-te chuan Kaizer fans-ho chemte in an bei vak mai a mi 42-in an boral phah. Hemi tuma boralte hi chil hlum an ni deuh vek.

4. ELLIS PARK DISASTER : Hei hi kum 2001 April ni 11-a thleng kha niin South Africa-ah bawk a ni. Johannesburg khuaa Ellis Park Stadium-ah Kaizer Chiefs leh Orlando Pirates tho an  inkhel leh a, a hmunah hian mipui 60,000 vel an awm. Thutna (seat) inchuhin mipuite chu an in nawr buai chiam mai a mi 43 chuan nunna an chan phah. Training nei lem lo Security guard-te chuan mittui tlakna hlo an hmang ngawt a mahse hei hian buaina a ti punlun hle. Orkney chhiatna ai khan nunna chan hi pakhatin a tam.

5. KAYSERI ATATURK STADIUM TRAGEDY : Kum 1968  September ni 17-a thleng a ni a, Tukey rama Kayseri Ataturk Stadium-ah a ni. Kayseri Erciyesspor Turkish Sports Club leh Sivasspor Turkish sports club-te inkhelhlaiin fans in tibuaiin mi 44-in an thih phah a mi 600 velin hliam an tuar. An in tihbuaina ah hian Silai, Chemte leh hmanraw hrawl tak tak an hmang.

6. BRADFORD CITY FIRE DISASTER : Kum 1985 May ni 11 thleng a ni a, England ram Bradford khuaa Valley Parade Stadium-ah a ni. Bradford City leh Lincoln City inkhelh laia thleng niin hemi ni hian Bradford city chuan Football League Third Division-a an champion lawm an tum ni a ni bawk. An stadium-a thutna (seat) a lo hlui ve tawh bawk nen rindan chuan tuemaw in a meizial nung (cigarette) paihna vanga kangmei hi chhuak niin an ring. Half time hma minute nga ala awm laiin kum 77 zeta upa an thutna atang chuan meikhu a lo zam tan a, Police-te chuan mipuite chu in thliar fihlim turin an ti nghal. Minute thum vel lek hnu chuan kangmei chu a zual kai ta a, referee Don Shaw chuan inkhel a ti tawp a khelmualah mipui an tlan lut. A alh nasa zual chu second 90 chhung vel lek ni mahse a hnuhma a turu hle. Mi tam tak tlanchhe hmanlo leh tang an awm a, mi 56 chuan he kangmei vang hian nunna chan in mi 450 velin hliam an tuar bawk.

7. THE LUZHNIKI STADIUM DISASTER : He chhiatna hi kum 1982 October ni 20-a thelng a ni a, Russia ram khawpui Moscow-a Lenin Stadium-ah a ni. Hemi tum hian UEFA cup-ah FC Spartak Moscow leh HFC Haarlem-te an inkhel a, ticket pawh nidang aiin an hralh tlem a hemi vang hian East Stand lama chhuahna chiah hawn a ni a, venhimna thila chhuahna tur pakhat hemi stand a mi tho hi hawn a ni bawk. Minute khat chiah ala awm thlengin FC Spartak chuan 1-0 in hma an hruai a, Spartak fans tam takte chuan ngaihtha tak haw tumin stadium an chhuahsan tan. hun pekbelhah FC Spartak tan Sergei Shvetsov chuan an goal hnihna a thun leh, an thawm hre pha  haw tum a stadium chhuahsan mek te chu kir in stadium-ah luh leh an tum a, lo chhuak ve mekte nen chuan an in nawr buai ta. mi 66-in an boral phah a, mi 340 velin hliam an tuar. Spartak goal hnihna thuntu Sergei Shvetsov chuan an inkhelh zawh hnuin, "Lo pet goal ta lo zawk ila tha tur." tiin a sawi.

8. PUERTA 12 TRAGEDY : Kum 1968 June ni 23 a thleng a ni ve thuing a. Argentina ram khawpui Buenos Aires-a Estadio Monumental-ah a ni. Hemi tum hian in hal em em mai River Plate leh Boca Juniors an inkhel a, buaina chhuak vangin mi 71-in nunna an chan phaha a, mi 150 chuangin hliam an tuar bawk. Thi zat hi sawidan a inang lo nual. An buai tan dan ni a an sawi chu Boca fans-te chuan River Plate flag chu halin River fans awmna lam ah an vawm a, buaina chuan zual lam pan zelin hemi hnu hian mipui hi an in nek buai zui ta a ni. Chhuah tumin an in nek buai a, mahse kawngka 12-te chu hawn a ni lo.

9. PORT SAID STADIUM DISASTER : He chhiatna hi kum 2012 February ni 1-a thleng a ni a. Aigupta rama Port Said Stadium-ah niin in hal kum hlun Al Masry leh Al-Ahly-te an inkhel. Al-Masry hi 3-1 in an chak a, mahse chak lawm an fans-te chu an che na hle thung. Al-Ahly fans an bei a, player-te pawh kut an thlak hial. Hemi tum hian Chemte, Bottle, Samurai leh Meithal lawn (fireworks) te an hmang. Mi 79-in nunna an chan a, mi 1000 chuangin hliam an tuar bawk.

10. THE NATIONAL STADIUM DISASTER : Kum 1964 May ni 24 khan he chhiatna hi thleng a ni a, Peru ram khawpui Lima-a National Stadium-ah a ni. Peru leh Argentina chuan Olympic qualifying match an khel a, he ram pahnih hi football-a ram in mil lo tak an ni. Minute hnihna ah referee chuan Peru lam pet goal chu a pawmsak lova hei hi an buaina bul chu a ni. Mipuite chu khelmualah an tlan lut a, stadium darthlang an tikeh a, mei alh an keng a pawisak an nei lo. Ram pahnih fans-te chu an in khuai nuai ta chiam mai a ni. He thil thleng vang hian mi 318 zet an boral a, mi 500 chuangin hlim na tak tak an tuar bawk. Boral zingah hian thla riat mi nausen (hmeichhia) pawh a tel ve. He chhiatna hi khawvel history-a chhiatna langsar zingah a tel pha hial a ni.