Aleppo atangin Aizawl: Mahmoud Amna zinkawng

 

Aizawl FC forward Mahmoud Amna hi I-League season kal meka ramdang (foreign) player pakhat a ni tih kan hre theuh awm e. Amna hian chanchin ngaihnawm tak a nei a, a chanchin atang hian zirchhuah tur pawh a awm nual mai.

Kum 34 mi ni mek hian kum 1983 January ni 25 khan Syria rama khawpui pakhat Aleppo atangin khawvel eng alo hmu tan a, a pianna khua Aleppo hian hunrei tak ata tawh tualchhung buaina a hmachhawn a tun thlengin he boruak hi ala kiang tak tak thei lo.

Rambuai kara lo seilian Amna hian theihtawpin football a khel chho hram hram a ram hrang hrang pangaah ei zawngin a khel kual tawh.

A kalna apiangah Indian football emaw mi nunphung chungchang ai chuan a pianna khua Aleppo chanchin zawttu a tawng hnem zawk.

Al-Ittihad forward hlui chuan, "Chanchinthar apiangah hian 'Aleppo, Aleppo, Aleppo' tih a ni reng a, hei vang hian Aleppo chanchin hi min zawt hnem khawp mai. Aleppo hian buaina tam tak a nei tih ka hria." tiin a sawi.

Tunhnaiah ngat pheichuan Aleppo hian chanchin a ngah zual hle a, Syria tualchhung buaina tuar nasa ber an ni a tih theih a hei vang hian Chanchintharah pawh he khaw hming hi a lang tam.

Tualchhung buaina vanga mi tam takin an chhuahsan Aleppo hi nikum December thla khan Sipaite'n helho lak atangin an lalet a, tunah hian buaina vanga raltlan tam tak chu Aleppo-ah hian an kir leh mek tih UN chuan an sawi.

Sawi chhunzawmin Amna chuan, "Buaina tam takin hual vel mahse khaw mawi tak a ni thung. India-a khawpui lian tak takte ang chu a ni lo, mahse Syria ramah chuan Damascus tihloha khawpui pawimawh ber a ni."

"Sumdawnna hmunpui anih bakah ei tur leh rimawi vanga hriat lar a ni a. Citadel of Aleppo kan nei bawk a hei hi a lar ve hle." tiin an khua hi buaina in chim reng mahse a chhuang tlat.

Kum 2011 khan Aleppo bul lawka tualchhung buaina vangin Aigupta (Egypt) ramah an pem a, Amna hian nupui tawhin a kawppui hi Aigupta mi a ni bawk.

An pem hnu hian Aleppo-ah hian ala kir leh miahlo a, ei zawnna ngaihtuah a tul vangin a chhungte bakah a thiante kalsan a tul a, a unaunu pawh an la chenpui reng.

Aleppo-a an awmlai boruak sawichhuakin Amna chuan, "Ka unaunu pawh a awm ve a. Tunhnai kum li emaw kum nga chhung kha chu khawsak a harsa khawp mai. Eng (power supply) a mumal lo si a ka unau ka koh (call) laite hian Bomb puak ri ka hre leh thin."

"A him lo va sikulte pawh tih chhiat vek ni mahse hun chu a liam ve zel tho. Tih theih a awm lo va mahni hna thawh a ni tawp mai." tiin a sawi.

Sipai kuta a awm leh tak vangin Aleppo hian nunphung pangngai a neih chhoh leh a beiseiawm a, Amna pawh hian nunphung pangngai leh thuai se a ti hle.

Sawi zelin Aizawl FC forward chuan, "Ka unaupa in Al-Ittihad khelmual en turin min kalpui ngei ang a. He club hi Aleppo-a club lian ber an ni. Ka club neih hmasak ber chu Al-Hurriya an ni a, mahse kum 20 ka nihin Al-Ittihad tan khelhna hun (chance) ka nei."

“Aleppo-a club-te hian pangngai takin football an khel reng tawh a, hmundanga khelchhuahte ngai rih fo mahse buaina tham a nilo. Thla khat a liam leh chuan Aleppo-ah hian game tin an khel thei tawhin ka ring."

"Keipawh an hnena kir turin min ngen fo va sum pawh an thehchhuak tam phal. Mahse tunah chuan thil ala pangngai tak tak lo va hnar a tul rih." tiin an ram dinhmun khirhkhan rih zia a sawi.

Amna hian Syria natioal team tan game 82 a khel tawh a, an ram hian sang tak an thlen theih ala beisei.

Sporing Goa tan pawh lo khel tawh thin chuan,"Syria-ah hian football a vul chho leh dawn chiang a, a chhan chu football kan ngaina hle."

"Syria national team-in World Cup qualifying round an khel tha a player naupang tak tak an awm bawk. Player tam zawkin rampawnah an khel a, thenkhat Middle East lamah, thenkhat Europe lamah an awm thung. Buaina a kian fel hun chuan team tha tak an nih theih ka ring." tiin an ram team leh player-te ah rinna a nghat.

Amna hian Asia khawmualpuia club lar ni phak thin Al-Ittihad tan kum 2003 leh 2009 inkar khan a khel a, Syrian Premier League-ah vawikhat champion puii Syrian Cup-ah vawihnih a champion pui bawk.

Syrian Premier League-ah Amna hian Al-Ittihad tan hian game 94 khelin goal 51 a khung thei a kum 2005 khan Nehru Cup-ah Syria national team pahnihna a nihpui.

AMNA SULHNU:
* Al-Hurriya (2001-2003)
League-a game khelhzat - 41
Goal khungzat - 7

* Al-Ittihad (2003-2009)
League-a game khelhzat - 94
Goal khungzat - 51

* Rah Ahan (2009-2012)
League-a game khelhzat - 68
Goal khungzat - 3

* Sulaymaniyah (2012-2013)
League-a game khelhzat - 56
Goal khungzat - 4

* Sime Darby (2013-2015)
League-a game khelhzat - 24
Goal khungzat - 6

* Sporting Goa (2015-2016)
League-a game khelhzat - 19
Goal khungzat - 3

* Aizawl FC (2017-
League-a game khelhzat (18/2/17 thlengin) - 9
Goal khungzat - 0