Kan thupuia kan luh
hmain engnge 'Hashtag' chu anih thiam ang tawkin han sawifiah phawt teh ang.
Mizo tawnga han dah mai chu a harsa a, mahse hrilhfiah theih erawh a ni.
Twitter-a account nei
chuan Hashtag hi kan hrethiamin a rinawm a, Facebook-ah pawh chin chhoh ve zel
a ni ta a chutiang bawkin Instagram leh social networking dangahte pawh hman a
ni.
Entirna: Kum 2014 khan
Santosh Trophy-ah Mizoram kan champion a, an lo haw dawn ni khan #InkhelFans
hi Hashtag-a hmangin Mizoram team lo haw chungchang kan post apiangah kan
ti tel anih kha. #InkhelFans tih kan hman hi link chi khat ang a ni ti mai ila
kan hriatthiam theihnan. #InkhelFans tihah hian hmet (click) ila tichuan
Mizoram team lo haw/thlen chungchang post kha kan hmu zung zung thei tawh mai a
ni.
A bikin (ti teh ang)
Twitter-ah chuan Hashtag hian thu a sawi thui thei hle a, #InkhelFans tih khi
Tweet (post)-ah mi tam tak (mimal pawhin) ti tel ta zel ila tichuan a lo
pung/darh ang a Worldwide trending (khawvel pum) hial pawh a kai thei. Trending
hi Worldwide chiah lo pawhin an siam a, India bik tan hian 'India trends' siam
a ni.
A chanchin kan sawi
tur Jelle Vossen pawh hi Twitter leh You Tube-a #FreeJelleVossen hashtag lar
vangin RC Genk chuan English club Middlesbrough hnenah an hawh tir phah niin
sawi a ni a, Boro fans-te thawhrah niin Belgian striker hi an club-ah lut tura
an duh vang a ni.
Belgian TV pakhatah
patlingpui tawh hian tap pur chungin, "Khawngaihtakin Genk, kal tir mai
rawh u Jelle Vossen hi kan mamawh." tiin a sawi a, hei hian he boruak hi a
vawalh thui hle.
Belgium mipuite pawhin
English Premier League hi an tui chilh em em a, an ram player - Vincent Kompany
(Manchester City), Eden Hazard (Chelsea) leh midangte pawh an hre hneh tlang
hle. He'ng vangte pawh hi ani mahna an rama league sangber (Belgian Pro
League)-a striker hlauhawm ni pha Vossen hian Championship club Middlesbrough a
zawm duh hi an dem rilru hle.
Kum 25 mi Vossen
chuan, "He club-a ka luhtirh khan Belgium-a mi tam tak chuan,
"Championship-ah ber kher engnge tih a tum phiangsen le?" tih an
ngaihtuah." tiin a sawi.
January ni 24 khan
Boro hian FA Cup fourth round-ah rinloh deuhin Manchester City an hneh a,
Premier League-a champion lai team captain hi Belgium captain ni bawk Vincent
Kompany a ni.
An inkhelh zawh hnuin
Vossen chuan, "Vincent kha ropui ka ti khawp mai, chak kan phu zawk tih a
sawi a kan khelhdan pawh a fak. Belgium mipuite'n min ngaihdan pawh ngai
pawimawh lo turin min hrilh a, Championship ropui zia an hre lo tih a sawi.
Khatiang thu han hriat kha a nuam." tiin a sawi.
Vossen hi goal khung
thei a ni a, kum 2011 khan Belgian Pro League-ah goal 20 khungin Genk a
champion pui.
A thiam vang hian
Belgium 'Golden Generation' an tih zingah pawh chhiar tel thin a ni a an ram
tan hian game 12 khel tawh, mahse beisei ang em em chuan a che tha zui lo
va kum 2012 hnu khan ram tan khel turin koh a ni leh tawh rih lo.
Sawi chhunzawmin,
"Kha generation an tih kha ka tem a mahse tlem chuan vanduaithlak deuhin
ka hria. Tunah hian tlarhma tichak turin Benteke, Lukaku, Origi, De Bruyne-te
kan nei."
"Kum 20 liamta
kha chuan piang ila ram tan vawi 50 ka khel tling ve ngei ang. Tunah chuan
Middlesbrough an kal tluan a Premier League an khel phate anih chuan koh ka ni
leh thei ang."
"Tunhma kha chuan
ramchhungah chauh inkhelin Belgian player-te an awm a, mahse hming chher theiin
England-ahte an lut ta a hei hian kawngro a su thui hle. An inkhel mai mai lo
va club lianahte pawh player langsar ni phate an ni. Hei vang hian kan rilru
pawh a in thlak zel a keimahniah inrintawkna kan nei tawh." tiin a sawi.
Vossen hian Cristal
Arena-ah kum 2011 khan Champions League group stage-a Chelsea leh Genk inkhelh
tumin Petr Cech-a venah goal alo khung tawh bawk a, he inkhelah hian minute
25-naah London club tan Brazilian midfielder Ramires chuan goal a khung a, Genk
tan minute 61-naah Vossen hian a sut a 1-1 in an in draw.
A club dik tak Genk hi
Belgian Pro League leh Belgian Super Cup-ahte vawikhat ve ve a champion pui
tawh a, Belgian Cup pawh vawihnih a chawipui tawh bawk a ni.
No comments:
Post a Comment