Hemi season Premier League hi a ngaihnawm a, thawnthu ang mai anih bakah table chung lam, a laihawl leh a tawp lamte inum nasat berna season ani hial maithei.
Khai leee....
* Swansea City 2-4 Sunderland (January 2016): Sunderland hian Swansea hi an hmachhawn tawhna game hnuhnung 15-ah vawikhat mah an hneh lo va, an hneh hnuhnun ber chu kum 1963-ah daih tawh khan a ni.
January thlaa inkhelah hian Sunderland tan Jermain Defoe chuan hat-trick siamin Swansea defender Federico Fernandez-a'n an lamah goal khat a ti lut bawk.
Welsh club tan hian Gylfi Sigurdsson leh Andre Ayew-te'n goal khung ve bawk mahse an chakpui zo lo va, an defender Kyle Naughton hnawhchhuah ani bawk nen Sunderland laka hunrei tak chhung tlawm nei lo record an vawnhim tawh pawh an chan phah.
* Manchester United 1-2 Norwich City (December 2015): Tun season-a talbuai Manchester United-in an khelmual Old Trafford-a Norwich City an hnehlo hian Louis van Gaal dinhmun a sawi nghing nghal a, Dutch manager hi an ban mai dawn niin sawi a awm zui a mahse Red Devils hian season tluanin an chhawr zui ta tho.
He inkhelah hian minute 38-naah Canaries tan Cameron Jerome chuan goal a khung a, hei hi minute 54-naah Alex Tettey chuan a belhchhah a United goal khat neih hi minute 66-naa Anthony Martial khung a ni.
An inkhelh zawh hnuin Manchester United player-te an fan-te'n an 'boo' a, hneh nei lova game ruk chhung an kal zawnna a nih laiin Norwich hi 'drop zone' atangin an talchhuak thung a, kum 1989 hnua Old Trafford-a an chak lehna hmasa ber a ni bawk.
Hei mai bakah hian Norwich hi kum 2001 hnuah Premier League-a team thar ni si Old Trafford-a Manchester United hneh leh thei hmasa ber an ni tel.
* Stoke City 1-2 Crystal Palace (December 2015): Hetih hunlai hian Stoke City khelmual Britannia Stadium-a luh hi thil chakawm tak a ni lo va, a chhan chu The Potters hian Chelsea leh Manchester City an hneh thei tlat.
Palace nen an inkhelh hma pawh hian Stoke hi an phur khawp mai a, hnehna erawh an chang zo ta lo. Palace tan hian first half tawp hma hretin Connor Wickham chuan penalty atangin goal a khung a, hei hi minute 76-naah Stoke tan Bojan Krkic chuan penalty atang bawkin a sut.
An inhnehtawk mai dawn emaw tih hnuin minute 88-naah Lee Chung-yong chuan Palace chakna goal a khung a, an chakpui bakah an chakna hian hetih hunlaia palina ni mek Tottenham a umphak tir bawk a ni.
* Newcastle United 6-2 Norwich City (October 2015): St James' Park-a inkhelah hian goal a sur surin a sur a ni ber a, Newcastle hian tun season Premier League-a hneh an neih hmasak berna inkhel ani tel bawk.
Magpies tan hian Georginio Wijnaldum chuan goal li ngawt mai a khung a, Ayoze Perez leh Aleksandar Mitrovic-te'n goal khat ve ve an khung bawk a Norwich goal neihte hi Dieumerci Mbokani leh Nathan Redmond-te khung a ni.
August thla atangin Premier League hi khelh tan a ni a, October thlaa hnehna chang ve chauh Toon Army-te Norwich an hneh hnu hian an sapatal.
* Manchester City 0-1 Manchester United (March 2016): He result hian Manchester City-in Premier League-a champion an tumna kawng a ti khaihlak hle a, champion tum leh season thara Champions League khelh phak tum an ni a City aiin United an chungnung ta zawk.
Etihad Stadium-a inkhelah hian minute 16-na chauhah mikhual team Manchester United tan Marcus Rashford chuan goal a khung a, hei hi Red Devils hian an chakpui a Manchester City champion beiseina a ti thuanawp em em bawk.
Goal a khung hian Rashford hi kum 18 leh ni 141-a upa a ni a, Manchester Derby-a goal khung thei naupang ber a ni.
* Tottenham Hotspur 1-1 West Brom (April 2016): He inkhel result hi Leicester City tan chanchin lawmawm a ni a, anmahni umtu Spurs-in West Brom an hneh zo lo hi an champion-na kawnga result pawimawh ber pakhat a ni.
He inkhela goal awm pahnih hi West Brom defender Craig Dawson khung ve ve a ni a, minute 33-naah an lamah a ti goal a minute 73-naah West Brom tan a khung thung.
He result vang hian pahnihna ni mek Spurs hian point sarih (7)-in hmahruaitu ni lai Leicester an umphak loh phah a, Foxes hian champion turin point thum chiah an mamawh bawk.
Spurs hian hnehna chang ngat se chuan Premier League-a champion tum inum a 'hot' chho viau dawn a, he inkhel result hian champion tur a hril thui hle.
* Norwich City 4-5 Liverpool (January 2016): Tun season Premier League-a "Game of the Season" an tih hial hi a hmuhnawm rem rem hle a, chak tur a chiang tawh emaw tih tawh hnuah an in draw a, a tawpah chak lo tura rin tawh zawk an chak daih bawk.
Carrow Road-a inkhelah hian Liverpool tan minute 18-naah Roberto Firmino chuan he inkhel goal hmasa ber hi a khung a, hemi hnu hian Norwich tan Mbokani Bezua, Steven Naismith leh Wes Hoolahan (penalty)-te'n goal khat theuh khungin The Reds hi an chhanglet a, minute 54 an khelh tlin chuan Norwich hian 3-1 in hma an hruai.
Chak zawk tur a chiang a ngaih anih tawh laiin Liverpool hian an bei let a, minute 55-naah Jordan Henderson chuan penalty atangin an si phurh a sut then a minute 63-naah Roberto Firmino bawkin goal khat a khung leh a 3-3 a ni.
Minute 75-naah Liverpool tan bawk Manchester City midfielder hlui James Milner chuan goal a khung a, 3-1 a chaklo reng tawh khan 4-3 in hma an hruai.
Norwich an beidawng mai bik lo, hun pekbelh minute 92-naah Sebastien Bassong chuan an si phurh a sut a 4-4 niin an in draw a rinawm hman tawh.
Huntawp hma tak tak minute 95-naah Adam Lallana chuan a tawp kharin Liverpool goal ngana a khung a, inkhel hmuhnawm takah The Reds hian hnehna an chang.
* Arsenal 0-2 West Ham (August 2015): Premier League season thar hawn nia inkhelah hian West Ham-in an manager thar Slaven Bilic hnuaiah hnehna an chang nghal a, Gunners tan erawh season hawnna inkhela chakloh hi a duhawm loh hle ang.
Emirates Stadium-a inkhelah hian Hammers tan minute 43-naah Dimitri Payet free-kick pet atanga ball kal chu Cheikhou Kouyate-a'n a tauh goal a, minute 57-naah Mauro Zarate chuan yard 25-a hla atangin goal nalh tak a khungbelh a an khelmualah Arsenal an hawi hil.
He inkhelah hian Arsenal-in 62% lai ball an chang a, mahse an si phurh an sut thei si lo va tlawm chungin season thar an hawng.
* Liverpool 0-1 Manchester United (January 2016): Hetih hunlai hi Jurgen Klopp hnuaia Liverpool-in insiam that an tum lai vel kha a ni a, an phur hle a an khelmual Anfield-a Manchester United an mikhual tur pawh hi khawvelin a nghakhlel hle.
Dortmund manager hlui hnuaia chona thar hmachhawn Liverpool hian goal an khung thei lo va, mikhual team Manchester United tan Wayne Rooney chuan he inkhela goal awmchhun leh an chakna ni bawk hi minute 78-naah a khung.
He inkhelah hian Manchester United keeper David de Gea a che tha hle a, Adam Lallana leh Emre Can-te pet tha tak takin a dang a Red Devils a chhanhim.
Anfield-a an chak hma hian Manchester United hian an game hnuhnung 11-ah vawihnih chiah hnehna an chang thei a, an chakna hian an manager Louis van Gaal dinhmun a ti that deuh bakah season thara Champions League khel pha turin beiseina a siam bawk.
* Newcastle United 5-1 Tottenham Hotspur (May 2016): He inkhel hi club pahnihte tan tun season Premier League-a an game hnuhnung ber tur a ni a, Leicester City an champion tih pawh a chiang tawh.
Table-a pahnihna ni turin Tottenham hian a chhe berah point khat chiah an mamawh tawh a Magpies lakah hian an hlawhchhuak thei lo va, an hmelma kum hlun Arsenal-in an lehpelh phah a pathumna an ni ta daih.
St James Park-a inkhelah hian Newcastle tan Georginio Wijnaldum chuan goal hnih a khung a, Aleksandar Mitrovic, Rolando Aarons leh Daryl Janmaat-te'n goal khat theuh an thawh ve bawk a, Mitrovic hi minute 67-naah hnawhchhuah a ni.
Spurs mualpho lutuk tur thup mawi nan minute 60-naah Argentine midfielder Erik Lamela chuan goal a khung ve a, awmzia erawh a nei tam lo.
Point an hlawhchhuah loh vangin Spurs hian point 70 neiin pathumna dinhmun an luah phah a, pahnihna ni ta Arsenal-in point 71 an nei thung.
Kum 1995 hnuah Spurs hian Premier League-ah Arsenal hi an la khum leh ta miah lo va, an record duhawm loh tak hi thatchhiat tum mahse season dang an nghah a ngai leh dawn ta tho a ni.
* Chelsea 0-1 Bournemouth (December 2015): Season tluana che tha lo Chelsea-in kai thar Bournemouth an hneh lo hi chu amak viau lo pawhin a lang thei a, mahse an chak loh ring erawh chu a tlem zawk an nih a rinawm tho.
Crystal Palace leh Southampton an hneh loh hnuin London club hian Bournemotuh an luhkhung a, an inhnehtawk mai dawn emaw tih tawh hnuin minute 82-naah Glenn Murray chuan Cherries chakna goal a khung.
He result hian hetih hunlaia Chelsea manager Jose Mourinho dinhmun a ti nghet lo zual hle a, The Blues hi table-ah 14-na an ni mek bawk.
* Manchester 1-3 Leicester City (February 2016): Etihad Stadium-a inkhelah hian Leicester City hi chaklo se chuan tun season Premier League-a champion hi an nilo hial maithei a, he an chakna hian kawngro a su hle.
He inkhelah hian rin loh zawk (?) Leicester tan minute thumna lekah Robert Huth chuan a tauh goal a, minute 48-naah Riyad Mahrez-a'n free-kick atangin goal a khung veleh a si hnih faiin hma an hruai.
Champion tura chak ngei ngei mai nilo, Leicester hneh ngei ngei mamawh Manchester City hian ball 66% chang mahse goal an khung thei tlat lo.
Minute 60-naah Huth bawl alo lang leh a, German defender hian Christian Fuchs corner pet atanga ball kal a tauh goal a Leicester dinhmun a sawh nghet.
Huntawp hma deuh minute 87-naah mualneitu Manchester City tan Argentina striker Sergio Aguero chuan goal khat khung mahse inkhel result a nghawng pawi tham lo.
Hetih hunlai hian Manchester City leh Leicester hi champion tuma inum zingah chuan ngaihven hlawh ber an ni a, City hian pahnihna dinhmun an luah a Foxes hi an chungah an awm.
Hemi tuma an chakloh vang hian City hian point nga laiin Leicester hi an thlauh phah a, a hnuah Tottenham-in an lehpel a season tawpah chuan palina an ni pha hram.
THUBELH: 2015-16 Premier League season ang hi chu a thleng khat a, champion lai Chelsea an zuih tluan thak a, rin loh deuh Leicester City an champion ta mai te hi hun lo la awm zel tura Premier League thawnthu ti ngaihnawmtu an la ni ngei ang.
No comments:
Post a Comment