Zlatan Ibrahimovic titi ngaihnawm

Sweden captain hlui hian Sweden tan game 96 khelin goal 48 a khung a, Football mai a thiam lova Taekwondo-ah Black Belt ngat anih bakah pa rorum tak chu a ni.
'
Zlatan Ibrahimovic titi ah lut tawh ila...

A naupanlai chanchin ti hian a sawi a - "Naupanlai hun nuam tak ka hmang a (Malmo khuaah), thenawm tha tak tak te, thian tha tak tak te nen. Swedish tak chu kan tam lo, ramdang mi te nen kan cheng hova mahse kan in tlawhpawh hran vak lo. Kan venga lo len te hi an hlau thei hle a, a chhan pawh ka hre ta bik lo, kan hlauhawm viau ni tur a ni. Mi motor rukchhuah te kha thil tha chu a ni hauh lo, mahse a hlimawm ve riau tlat a ni. Khatiang hmun atang khan ka lo thanglian a, nuam ka ti. Vawiin a heti tiat ni tur a min siam tu zing a mi ni hialin ka hria."


ARSENAL-ah a lut tep - "Arsene Wenger ka hmuh hmasak ber chu Malmo-a ka khelhlai khan a ni a, kan Director of Football-n min hrilhdan chuan khami hunlai khan dawrtu pawh ka nei nual mai. Tichuan nikhat chu kan director chuan, "Arsenal-ah Wenger-a hmu turin kan kal dawn nia." a ti a. Arsenal training-na hmun kan thleng chu ka awm mekna Malmo nen inthlau tak hi a ni ringawt. Wenger nen chuan kan inkawm a, tukverh atang chuan pawnah Dennis Bergkamp, Thierry Henry leh Wiltord-te ho ka va hmu a, ka rilru tete in, "Wow ! TV-a ka hmuh thinte kha a takah ngei ka hmu a nih hi." tiin.”

“Wenger-a chuan Arsenal jersey no. 9 ka hming chuanna chu a lo la chhuak a. Ka phuzawk a, mak ka ti a engmah ngaihtuahna fim ka pu tawh lo. Ka duhber chu jersey hak a inkhelh a ni tawp mai. A hlimawm ve em a tin ni."

"Wenger chuan amah zui a ka inkhel a hmuh duh thu a sawi a. "Kan inkawm ve vek tawh sia ngatinge mawni le ka inkhel ala hmuh duh tho chu le? Engnge kan tih tak he hmunah hian?" ka ti rilru a. Tha an ti che a, lei an duh che anih chuan i theihna an hrechiang tawk tihna a ni a, mahse chumi hnu a kan inkhel an la hmuh duh fo chuan a lungawi thlak viau loh a ni. Malmo director of football hnenah chuan, "He hmunah hian ka thatzia entir tur a kal ka ni." tih ka hrilh a, mahse a ni chuan a dik lo tiin min chhang thung."

"Malmo director of football chuan minlo khapin hmanhmawh lutuk lo tur leh Malmo lama kan kir leh tur thu a sawi a. Tichuan Ajax lamin minlo dawr tan ta a ni. Kan haw dawn thlengin Arsenal chuan, "Kan duh lutuk che, tunah kan duh che." min la ti lawm lawm a. Min ngaihlut avangin ka lawm hle. Min duh tak tak a ni. "Lokal la i thatzia han lantir teh." tiin min ko ta la i ngenna chu ka ti hlawhchham ngai lovang."

"Kum tam a liam hnuah Wenger- chuan thu hriatsual vanga kir san kan ni ang in a sawi a. A ni chuan, "Lokal la he hmun nawmzia hi han en vel teh." tih sawi a tumna tiin a sawi leh si a, tak tak nge dawt pawh ka hre lo. Khami hunlai khan ka la naupang a Saptawng ka thiam lo hle a ni."

SOUTHAMPTON-ah a lut tep - "Ajax-a ka kumkhatna ka hman that vak loh vangin Southampton khan minlo dawr a. Kan manager pawhin, "Southampton-a lut tur in inring rawh," min ti hman hial a. Keichuan, "Chumi chauh chu em ni duhthlan tur ka neih? Hun harsa ka hmachhawn mek hi siamthat ka duh a ni." tiin ka chhang a."

"Khami hunlai kha chuan Ajax kha tha berah ka dah a, chhuahsan ka tum lo bur. Southampton lamin lo ngai haw lo se, Ajax atanga Southampton-a luh chu hnungtawlhna ni a ka hriat vang a ni. Theihtawp ka chhuah ta a, a kum hnihna chu tha takin ka zova, kum thumna ah pheichuan ka khel tha hle a Juventus-in minlo dawr a, chhuah pawi tihna ka nei tawh lo."

ENGLISH FOOTBALL-ah - "A hmuhnawm ka ti a. Ka player duhber chu Wayne Rooney hi a ni. Rooney hi player tha tak a ni a, a bula khelh pawh ka suangtuah ve thin. Amah hi season khat a goal 40 vel thun thei chi a ni lova ka ngaihdan chuan, mahse a fing a, a thiante pakhat emaw pahnih emaw pathum tan hun tha a siamsak thei a tha ka ti khawp mai. Tharum angah a, keimah ang bawk a tlawm duhlohna rilru a pu hi fakawm ka ti hle bawk. A chang chuan a thinrim insum zawhloh chang te pawh a nei a, ka hrethiam khawp mai ka tawn hnu ve tho ania. Mahse a insiamtha thei a chhunawm ka ti."


Sweden-in kum 2012 November thla a England 4-2 a an hneh chungchang pawh a sawi lang a. Zlatan chuan, “Engvangin nge England lamah a pet goal theihloh, engtin nge a pet goal ang? tihvel thu a leng a, ka thinrim a, chona pawh minpe hle. England chanchinbu mite chuan England tha ber ang in an sawi a, mahse an lamah goal ka thun ta. Kha ka bin goal kha, keeper (Joe hart) lo tlan chhuak kha ka hmu a, ball kha hla thei ang ber a head a tum tih ka hria. Ball ka chan khan khalh leh phawt ka tum a, mahse ka rilru thlakin goal hlat zawngin ka tlan a, tichuan keeper a chhuak a, midang pawhin goal-ah ka pet ring lovin an awm dawn tih ka hria a. Tichuan goal lamah ka bin ta luah mai, a goal ta ni. Ka pet zawh chiah khan boruaka ka awmlai in ka enzui nghal a, ka va lawm tak em !" tiin a sawi bawk. Hemi tuma a pet goal hi, Liverpool leh england captain Steven Gerrard chuan a goal hmuh tawha nalh ber anih thu a sawi.

David Beckham bula khelh chungchang pawh Ibra hian sawiin, "PSG-a alo luh khan mi mit zawng zawng amah ah a fu a, mahse a buai hauh lo. Pa chhuanawm tak a ni, a lo luh tirh thlakhat vel kha chu a inthlahrung ve hle a, mahse kan inkawm tam tial tial a, a puitlin zia ka hmu telh telh. Footballer tiin i hria a, a chanchinte pawh i chhiar fovang. A takah ngei a bula han tlat chu a nuam a, sawiselna tur pakhat mah ka hre lo. Footballer kan nih chuan kan eizawnna kan ngai pawimawh tur a ni a, chu chu Beckham hian a tidik a ni. Thildang in tihbuai tir vak a duh ve lo. Mi fakawm tak a ni." tiin a sawi.

Ibra hian Jose Mourinho, Fabio Capello leh Carlo Ancelotti-te chu a ngaihsan thu leh a zah reng tur mi an nih thu a sawi bawk a ni.