 |
| (Getty Images) |
Rimawi khawvela mi pakhat ni phak Justin Bieber hi Kristian țha tak a ni tih chu sawi thui ngaiah ka dah lo va, sawi țul ber lah a nilo. Tun țumah hian a chanchin țha lam leh chhe lam kan enho dawn a, mihring hi kan lo famkim lo a ni tih i hria ang.
Harsatna, buaina leh hrehawmna in min chhim fo mahse mi chak leh tumruhte chu an dingchhuak leh tho țhin.
JUSTIN BIEBER
Pianni leh kum: March 1, 1994
Pianna khua: London, Ontario, Canada
Pianpui hming: Justin Drew Bieber
Pa hming: Jeremy Bieber
* Justin Bieber hi Patricia “Pattie” Mallette leh Jeremy Jack Bieber-te inkarah alo piang a, anu leh pate hi an innei lo.
* Apa Jeremy Bieber hi MMA fighter ni țhin a ni nghe nghe.
* Anu hian zai lamah a tuipui em em a, You Tube-ah a fapa zai hi dahin hei hi alo larchhuahna kawng a ni. You Tube-a Bieber zai video hi tuna a manager ni mek Scooter Braun hian alo hmuhin a zaithiam zia a hria a, Atlanta-ah kalchilhin contract a ziahpui.
* Justin hian Onesie (jumpsuit) a ngaina em em a, The Hollywood Reporter photoshoot-ah pawh a hak kha.
* JB hian rapper Drake a ngaisangin a duh em em bawk a, Drake hi Bieber-a'n a unaupa ang maiin a en tih a manager Scooter Braun chuan a sawi.
* Bieber hian apa lam ațangin unau pahnih Jazmyn Biber (kum 2009-a piang) leh Jaxon Bieber (kum 2010-a piang) a nei a, a naute hi a ngaihsak bakah a duat hle tih social networking lama thlalak a post ațangin a hriat.
* Kum 2009 May thla khan a hla hmasa ber "One Time" a tichhuak a, United States leh Canada-ah Platinum a kai pha nghal.
* Kum 2009 November thla khan hla pasarih awmna album ni chiah lo deuh EP "My World" a tichhuak leh a, hei pawh hi United States-ah platinum a kai phak leh bawk.
* Justin hian Twitter-a thu post vel a nuam a ti em em bawk a, a fan-te a ngaihsak zia tih lan nan a 'Follow back' hnem hle bawk. (Keipawh hi min Follow ve ngei alawm.)
* R&B singer Usher hi Bieber lo larchhuah theihna tura mi țangkai tak pakhat a ni a, Hollywood lama sulhnu hnutchhiah ve nual tawh Will Smith pawh hian thurawn a pe țhin niin an sawi.
* Kum 2009 November thla khan New York-a Roosevelt Field Mall-ah zai turin programme siam ni mahse an țhulh a, hei hi a chhan chu amah duhtu hmeichhe tam tak pungkhawmin harsatna an siam vang a ni.
* Justin hian thil tih theihna ropui tak (super power) nei se chuan thlawh (fly) theih a chak ber.
* Ice cream-a a flavor ngainat ber chu cotton candy a ni bawk.
* Kum 2010 March thla khan a album puitling hmasa ber "My World 2.0" a tichhuak ta a, Billboard-ah pakhatna dinhmun hauh nghalin 5million chuang a album hi hralh a ni tawh.
* Selena Gomez bialpa hlui hian Rachel McAdams leh Ryan Gosling-te channa 'The Notebook' kha hmuhnawm a ti hle a, he movie hi chu Mizo zingah pawh a lar.
* Kum 2010 April thla khan "Saturday Night Live"-ah a lang ve.
* Kum 2011 February thla khan 3D concert film, "Justin Bieber: Never Say Never" a tichhuak a, hei vang hian khawvel pumah $100m dawn a hailut.
* Kum 2011 November thla khan khatih laia kum 20 mi lek la ni Mariah Yeater chuan Justin nen hian a concert-naah an mu dun a, a fapa thla thum mi ni mek pawh hi Bieber fa ngei a ni tih court-ah a sawi a, hetih hunlai hian JB hi kum 17 mi ala ni a, he an thubuai hi kar thum hnuah tihtawp (dropped) a ni.
* Breakfast atan a duhber chu Berries telh Captain Crunch a ni.
* JB hian țhian ngainat deuh pahnih a nei a, chumite chu Chaz Somers leh Ryan Butler-te an ni.
* Kum 2011 November thla khan a studio album pahnihna ni turin "Under the Mistletoe" a tichhuak leh a, copy maktaduai (million) hnih chuang an hralh.
* Bieber hian TV show-ah chuan 'Smallville' leh 'Friends' hmuhnawm a ti ber.
* Kum 2012 June thla khan a studio album pathumna "Believe" a tichhuak leh a, khawvel pumah copy maktaduai 2.7 chuang an hralh.
* "Believe" an tihchhuah hnulawk kum 2012 July thla khan Los Angeles-ah motor khalh chak lutukah an puh a, thubuai a nei. Hemi tum hian a sports car $100,000 man Fisker Karma a khalh chhuak.
* Vawikhata a lumeh man hi $750 nite in an sawi.
* Kum 2013 March ni 4 khan London-a O2 Arena-ah a concert a, darkar hnih zeta a tlai vangin a fans tam tak an lungawi lo hle.
* O2 Arena-a a concert zawh hnu hian a chauh em avangin Damdawi inah a awm a, March ni 8-ah a chhuak. A concert hun taka a tan theihloh vang pawh a hriselna hniam vang hi a ni tih a manager Scooter Braun chuan a sawi.
* Kum 2013 Mrach thlaah bawk hian Germany-ah a zawng (monkey) khawi, Mally chu Germany thuneitute'n an laksak a, an laksak chhanah chuan Bieber hian neitu nihna diktak in ziahna a nei lo anti. Mally hi Germany hmar lama awm Serengeti Park-ah dah a ni.
* City Church-a Pastor ni mek Pastor Judah Smith nen nitin thu (texts) an in thawn ziah a, Pastor Smith hian South Africa leh Australia-ahte Bieber hi zuiin hlawhchham mahse hnual lo turin a fuih țhin.
* Kum 2013 July thla khan restaurant pakhat kawta mop bucket-ah a zung tawp a, mop bucket bula an tar US president hlui Bill Clinton thlalak pawh a phuh per. A hnuah JB hian Clinton hnenah ngaihdam a dil.
* Tun thlengin Justin hian Twitter-ah Followers 91.8M a nei mek a (19/2/2017 thlengin), hei hi a pianna ram Canada mipui zat aiin an tam daih!
* Kum 2013 September thla khan China khawpui Beijing-a concert a neih hmain Great Wall of China an tlawh a, hetah hian amah vengtu (bodyguard)-te'n an kokichhuan chho va sawiseltu a ngah hle.
* Kum 2013 urlawk ni (December 24) khan music chawlhsan a tum thu Twitter-ah post mahse a hnulawkah hla a buaipui mek thu a tarlang leh.
* Kum 2013 Krismas ni tak khan a movie thar "Believe" chu chhuah țan a ni.
* Justin hian number ngainat bik a nei a, chu chu Paruk (6) a ni. (Hetah hian kan in ang chiang hle, ka hriat tirh khan keipawhin mak ka ti. Mahse kan number ngainat alo in ang hi nuam ka ti lutuk.)
* School a kal lai chuan Chess, Soccer (Football) leh Hockey a khel ve țhin a, tun thlengin he'ng infiamnate hi a hnehsawh ve hle.
* Kum 2014 January ni 14 khan Los Angeles-a County Sheriff Department chuan Calabasas-a Bieber in dap theihna tura phalna an lachhuak a, hei hi a chhan chu Bieber hian an țhenawmte in chu Artui (Egg)-in a vawm chiam mai tih thu an dawn vang a ni.
* January ni 23, 2014-ah bawk khan Florida-a Miami Beach-ah rui chunga lirthei a khalh vangin an man a, an man chhan hi rui chunga lirtheih a khalh bakah man an tumin a duh lo va license thi tawh a hman bawk vang a ni.
* Trumpet, Guitar, Piano leh Drums-te hi amah a in zirchawpin a thiam vek.
* Kum 2014 January ni 29 khan Toronto-ah limo driver kutthlakah an puh a, thubuai siamsak leh a ni.
* Kum 2014 July thla khan Bieber hian Artui hmangin an țhenawmte in a vawm ngei tih a pawm a, a thil tihchhiatte thawm țhat nan $80,900 chawitir anih bakah kum khat chhung enthlak a ni a an țhenawmte in hi a hnai berah yard za (100) tala hlat turin tih a ni tel.
* Toronto Maple Leaves (Hockey team) a țan rum rut.
* EBay-ah a sam a lilam a, $12,000 zetin a hralh a an sum hmuh hi țanpui ngaite țanpui nan a pe vek.
* Minute hnih hmain Rubik's cube a remdik vek thei!
* Kum 2012 September thla khan anu Patricia Mallette chuan “Nowhere But Up” tih lehkhabu a tichhuak a, hetah hian ama mimal chanchin bakah a fapa hringnun a hun hlimawm leh hun khirh a tawn chungchangte a awm.
* Kum 2015 September ni 10 khan The Guinness Book of World Records chuan World Record pariat a siam vangin Bieber hi chawimawina an hlan a, a chawimawina dawn chhante chu:
1. Kar khat chhungin Spotify-a zai stream hnem ber - What Do You Mean? (30,723,708 times)
2. Kar khat chhungin Spotify-a album stream nasat ber - Purpose (205millions times)
3. U.K. singles charts-ah pakhatna atanga pathumna hauh rual thei hla pathum nei hmasa ber - 'Love Yourself', 'Sorry',What Do You Mean?'
4. Billboard Hot 100-a hla lang thei nei hnem ber - 17
5. Twitter-a followers ngah ber - 91.8M (19/2/2017 thlengin)
6. Mipa zingah You Tube-a subscribers ngah ber - 27,313,289 (19/2/2017 thlengin)
7. You Tube channel zinga entu/tlawhtu ngah ber - 10,478,651,389 (30/8/2016 thleng khan. Tunah chuan a pung leh tawh viau ang.)
8. Billboard Hot 100-a hla lang zawn thei nei hnem ber - 13
* Kum 2015 November ni 13 khan a studio album palina 'Purpose' tihchhuah a ni leh a, kar khat chhung lekin America-ah copy 522,000 an hralh hman!
* "What Do You Mean?"khan ram hrang hrang 18 Chart-ah a hunlai khan No. 1 dinhmun a hauh thei a, "Sorry" pawh khan ram hrang hrang 10 chuang Chart-ah No. 1 a hauh pha vek.
* Kum 2016 February ni 15 khan "Where Are Ü Now" vangin Grammy-ah Best Dance Recording Award a dawng.
* Twitter-ah Bieber hi second tinah vawi 60 vel an mention hman ziah niin an chhut.
* Bieber hian 'claustrophobia' a vei a, elevator/lift chuan a hlau niin an sawi.
* "Never Say Never" hlaah khan Justin hian "Never" tih ringawt hi vawi 69 lai a lamri hman.
* JB rawng (colour) ngainat ber chu Purple (Senduk) a ni.
* Kum 2010 January ni 30 khan Twitter-ah 1,000,000 followers a nei tling.
* Germany-a Purpose Tour an neih khan German țawngin a fan hmeichhe pakhat hnenah “Ich Liebe Dich” (Ka hmangaih che) a ti mai chu henu hi a thidang nghal țhak!
* "U Smile" hlaah khan "Smile" tih ringawt hi vawi 36 a lam ri .
* A nuhrawn (stepmother) hming hi Erin Bieber a ni.
* Kum 2016-ah ringawt khan Purpose Tour atanga a sum hmuhin naupang nu leh pa neilo enkawltu pawl Pencils Of Promise hnenah 1.5million Dollars a pe.
* A post ațanga second 30 a liam hmain Twitter-a a thil post apiang hi vawi za (100) chuang Retweet a ni hman ziah.
THUBELH: Tarlan tur tam viau mahse hemi chin hi ni mai rawh se.
Justin Bieber official Twitter account: Justin Bieber
Justin Bieber official Facebook page: Justin Bieber
Justin Bieber official Instagram account: Justin Bieber
Beliebers Mizoram official Twitter account: Beliebers Mizoram
No comments:
Post a Comment