India titi Aizawl FC

"Puia, chu chu English-in engnge a awmzia? Ka ziak tel duh zel ania." - Sharda Ugra (Senior editor at ESPN India)

HMANAH CHUAN.....

Kan naupan ve deuhlai, Facebook, Twitter leh Instagram vel awm hma khan Indian Football hi ka lo tuipui ve viau tawh țhin a, ka țhianpa Rammawia (Mawipuia) nen kan sawidun ve nasa țhin.

Vanglaini chanchinbua I-League chungchang an ziahte kha chhiar hlan kan nghakhlel thei em em a, TV-ah pawh kan hmaih ngailo ti ila ka sawi uar lutuk lem lovang.

Kan en a kan chhiar bakah kan sawidun ve laih laih a, Tuaitea leh Jerry Zirsanga thlengsang ta lo lutuk kan ui ziate leh Odafa 'class' lo lutuk kan nuihpuih nasa theihziate kha awww.... Barreto sum pai hnem lutuk Airport-a an lo man te leh an hlawh hnem dan tur kan inrinsiak laite kha khuarei an lo chang ve ta reng mai!

Mobile phone pawh kan neih ve hma kha chuan Vanglaini chanchinbu hi Infiamna chanchinthar kan hriat theihna hnar ber a ni ve țhin a, Rammawia-te in hi mi zawng zawng luh khawmna ('Runmawi' tia Valzotea'n a tih ang kha) anih avangin Vanglaini chanchinbu kan nghak țhap zel a, zanriah eikhama chhiarte chuan an chhiar zawr tawh viau țhin. Kan khal chul hneh hma thei hle a, Rammawia-te thingpui in paha Vanglaini chhiar tluka nuam kha tun thlengin ka la hre lo hial nia mawle!.

Mizo zingah chuan Indian Football hi tuichilh hmasa pawl kan nih phak ve ka ring a, tuna Aizawl FC-in I-League nomawi an ban pha ta mai hian kan nunhluite min hriatchhuah tir rum rum a lungte pawh a tileng uaih uaih mai.

A FUH CHHO ZEL

Kum 2014 khan Mizoram team-in Santosh Trophy nomawi chawiin Indian football-ah Mizote'n bung thar pawimawh tak mai kan ziak a, Santosh Trophy-a kan champion hnu hian hnungtawlh chu sawiloh hma kan sawn chak rem rem hle.

Kum 2014 hma pawhin Mizote football thiamzia hi chu a langchhuak fo tawh a, S. Malsawmtluanga'n Kolkata khawpui a sawinghing fo tawh țhin a hemi hnu hian midang țha tak tak an chhuak bawk.

Mizoram Premier League (MPL) din chhoh a ni bawk a, Mizote'n eizawn nan football kan hmang chho țan tak tak a phai lam club-te pawhin MPL ațang hian player țha an melh ve reng bawk.

AIZAWL FC HLUI

2015-2016 season-ah Aizawl FC-in Mizo football tan bung thar keuin I-League an khel a, Mizoram-in Indian ram football-a league sangberah a vawikhat nan club kan nei ve ta.

An season hmasa berah Aizawl FC hian sulhnu țha hnutchhiah lo mahse Mizoram-in kan ngaihlu a țan pawh kan țan tlang. Khelmual (home stadium)-a an hman Rajiv Gandhi Stadium-ah eng club (club lian/lar emaw lian lo/te) pawh hmachhawn se mipui sang chuangin kan țawiawm thei reng a kar laklawh (mid-week)-ah pawh stadium khat tawk chu kan awm reng thei zel.

2015-2016 season

2015-2016 season-ah hian Aizawl FC hi an in hamtang zo lo tih kan hre tlang a, amaherawhchu All India Football Federation (AIFF) lamin Mizote football atchilh dan leh Aizawl FC hi I-League khel tlak an la nih zia an hria a, 2016-2017 season țan hmain The People's Club hi I-League khel leh thei turin an kokir.

AIZAWL FC THAR HLAK!

Kum 2017 January ni 7 ațangin I-League 2016-2017 season khelh țan a ni a, an țan niah hian Aizawl FC chuan Barasat Stadium-ah East Bengal luhkhungin India rama football club hlauhawm loh ni ngailo zinga ami hi si khat ve ve inpe in an inhnehtawkpui.

Red and Gold an draw hi mi tam tak chuan an ti fuh niin an ngai mai a, amaherawhchu Khalid bhai hnuaia khel tawh Aizawl FC hian India rama football club liante pawh an el pha tawh tih an lantirna alo ni reng si!

An game hnihnaah Aizawl FC hian Minerva Punjab FC chu si khat faiin Rajiv Gandhi Stadium, Aizawl-ah an hneh a, vanneih vanga East Bengal draw mai mai an nilo tih a chiang țan.

An game thumna pawh Rajiv Gandhi Stadium-ah bawk hian khelin North East Derby-ah season hmasa I-League-a an ngamloh Shillong Lajong FC chu 2-1 in an hneh leh a India-in Aizawl FC hi an ngaihsak chho țan viau.

2016-2017 season

Khalid-a leh a naute hian table mawnglama awm hrehawm zia an hria a, hei vang hian table mawnglama tawnhriat neih leh an duh tawh lo tih lantir nan Cooperage Stadium-ah Mumbai FC chu 1-0 in an hneh leh a, state pawna an khelh hian state pawn lama awm Mizote'n an țawiawm țha thei hle bawk.

Tlawm nei lo va game thum chhung an kal tluan hnuin January ni 28, 2017 khan Jawahar Lal Nehru Stadium-ah Chennai City FC chu si hnih faii an hneh ta lo. Heta an chakloh vang hian mi țhenkhat chuan season liamta ang bawk an nih leh an ring hman awm e; amak lem lo. Mahse season thara Aizawl FC hi season liamtaa Aizawl FC kha an ni tlat lo, Aizawl FC thar hlak an ni tawh!

Chennai City FC an hnehloh hnu hian an khel leh nual tawh a game hnihah hnehloh an nei a, an hnehlohte hi Mohun Bagan leh Bengaluru FC-te niin khualmualah ve ve a ni thung.

Rabindra Sarobar Stadium-a an hnehloh tawh Mohun Bagan hi April ni 22 (Inrinni) khan si khat faiin Rajiv Gandhi Stadium-ah an hnehlet ta thung a goal awm chhun hi Zohmingliana Ralte (Zotea) khung a ni.

INDIA TITI LUAHTU AIZAWL FC

Aizawl FC an lar chhoh viau ruala mite sawi hmaih ngailoh chu fans an nei țha thei em em mai hi a ni a, state pawnah țantu an nei țha a an khelmual Rajiv Gandhi Stadium-ah pheichuan mipui 97% aia tlem lovin The People's Club hi an țan vek zel ti ila ka tisual em emin ka ring lo.

Mizoram pawna awm Indian media-te'n Aizawl FC chanchin ziah nuam an ti em em a, Indian writer tam takin Aizawl FC chanchin an in ziah siak luai luai a; a neitu Mizote zawk hi a ziak tlemah kan țang daih tawh!

Ziaktu țhenkhat hi chuan ralkhat ațanga mi sawi leh ziah emaw TV ațanga lo thlir mai duhtawk lovin a hmun (Rajiv Gandhi Stadium)-ah ngei an lo kalchilh fova chanchin (article) ngaihnawm tak tak ziakin Mizote football atchilhzia an thehdarh.

RG Stadium-a Mohun Bagan nen an inkhel khan Twitter-ah chuan #AFCvMB tih hashtag hian India ramchhung Twitter-ah a chungber a luah pha vah a, Twitter-a trending neih a har zia hi chu sawi fe tham ni mahse sawizui duah ka tum lo. Mahse a awlsam lo khawp mai tih chu hre tlang ila ka duh.

Kha inkhel chhim tur khan phai lam ațang pawhin Mizorama rawn zin phah nidang aiin an awm tam a, rawn zin zinga a tam zawk kha chu thuthar lakhawmtute an ni ang.

inkhel.com puihna vanga article ngaihnawm tak tak ziak pawh an ther fur tawh a, Pu Lalnghinglova Hmar (Tetea Hmar) phei hi chuan mi engzat tak lo țanpui a Mizo football chanchin hi lo fah tawh tak maw? inkhel.com tawn ai hi chuan a tam fe ang tih hi a chiang.

Mimal emaw pawl ang piahlamah hian India ram chanchinbute thu chhuah nuam ti pawh Aizawl FC chungchang bawk hi a ni a, India rama chanchinbu lar Times Of India (TOI) pawh hian Rajiv Gandhi Stadium-a Aizawl FC an khelh apiangin an aiawh an rawn tir ziah a chanchinbu dang lar tak takte pawhin an aiawh an rawn tir fo bawk.

India ram football chungchang tarlangtu langsar tak leh mi zawng zawngin India ram football an enna ber tih ngam Football News India (FNI) timeline han en (check) hian Aizawl FC chungchang a in tlar thla pet put reng (Hei hi Twitter lam ka sawina a ni).

      Twitter-a Aizawl FC chungchang an sawina țhenkhat

                                         

Aizawl FC-in Indian football an sawinghing lawih hnu hian kan Indian pui ('Vai' han tih leh ngawt țhin hi chu ka inthlahrung deuh) ho hian Mizoram football an ngaihven nasa em em a, sawi tawh angin a ziak thiamte'n an in ziahsak chur chur tawh a, an la ziak zel ang..

'RO MIN RELSAK ANG CHE'

Rajiv Gandhi Stadium-a Aizawl FC an inkhel hmain Mizoram hnam 'Ro min relsak ang che' tih hla, Pu Rokunga phuah hi mipuite'n an sa ziah a, he hla hian hnam hmangaihna rilru mitinah a tuh rualin player-te a tiphur tel tlat bawk.

Chennai City laka goal a khung vangin Brandon Vanlalremdika'n Pathian hnenah lawmthu a sawi.

Mohun Bagan leh Aizawl FC inkhel țum pawh khan phai lam ațanga lokal thuthar khawmtu țhenkhat chuan 'Ro min relsak ang che' tih hi English-a dah an duh si a an bul ami Mizo țhenkhatte an zawt nak nak.

Hnam hla țha leh ropui tak kan neih hi vawnghimin (hla thu en lovin) sa thei vek ila a lawmawm viau ang.

TLANGKAWMNA:

Aizawl FC hian Mizote min suihkhawm hle tih pawh a hrana sawi zui tham ni mahse tun țumah hi chuan hemi chinah hian duhtawk mai ila, Pu Robert Romawia Royte-te chhungkaw inpekna pawh hmuh hmaih chi a nilo.

Mizoram Premier League (MPL)-a vawihnih champion tawh Aizawl FC hian I-League nomawi an chawi emaw an vanduaia an chawi ta lo anih pawhin India hian Mizoram hi engtikah mah an hnuai en leh ngaiin ka ring tawh lo.

RG Stadium-ah New Indian Express sports writer Vishnu Prasad leh Indian Express sports writer Mihir Vasavda-te nen. (22nd April, 2017)