ROAD TO BIEBER

"Mumbai-a ka lokal thei hi ka lawm a, ka lokir leh ngei ngei ang." - Justin Bieber

Alo lar tirh kum 2007 chhoah khan ka duh satliah ve mai țhin a, atchilh bur erawh ka ni bik lo. Kum 2011 alo herchhuah khan ka duh telh telh a kum 2012 ațang kha chuan a (Justin) fans hming 'Belieber' zingah tel ve tawhin ka hria a; ka in ti 'Belieber' ve țan.

Hun hmasa lam hi chu sawilang thui ta lo law law ila. Ni e, World Record pawh vawikhat aia tam siam tawh JUSTIN BIEBER hi atak ngeiin ka hmu tawh a, a taka ngeiin a zai rualin ka zai tawh a, a tak ngeiin a vun leh che vel ka hmu tawh a; a takah ngeiah a thu zawmin Thla (moon) khi ka en ve ngat tawh bawk.

Zeh tel hram ka duh chu Justin Bieber hian kum 2016 September ni 12 khan Twitter-ah min lo 'follow' ve hlauh mai a, tun thlengin min la 'Follow' ve char char a hei ringawt pawh hi ka tan chuan 'Chawimawina' a ni tawh.

India-ah a lokal/concert dawn tih kha kum 2016 kumtawp lam ațang khan sawi a awm a, keichuan ka awih thei lo va ka ring ngam lo hrim hrim bawk. Mahse sawi a tam tial tial a kum 2017 February ni 15, India sanaa 12:55pm-ah Mumbai, India-a concert a neih tur thu hi Twitter-ah a tarlang ta mai a! Mak ka tih bakah awih har ka ti ngei mai. Sawi thui lo zel ang.....

             TICKET KA NEI VE MAI

A lokal dawn tih an tarlan hnu hian India lama lo buaipuitu ber BookMyShow lamin ticket chungchang an tarlang zui ve nghal a, ticket hi internet kaltlang (online)-a hauh (book) theih a ni tih pawh an tarlang tel.

Purpose Tour India concert ticket hi February ni 25 ațangin a book theih dawn tih an sawi a keipawhin chan ngei tumin February ni 25 hi ka chhinchhiah ran a, mahse ni 24-ah book theihin an siam deuh thut a ka phili ngei mai!

Ka ticket book-na

Ticket book-na tur sum ka nei mang silo va chan erawh ka tum ruh ve em em si. Kolkata lama awm mek ka țhiannu Elizabeth Lalremtluangi (Eli) ka be thuai a, Bieber ka ngaihsan zia hretu zinga hre berte zinga mi anih avangin min phurpui a, ticket chu ama sum pukin ka han book ve ta țhuai mai a tih tur la tam zia ka dawn pha reng reng lo.

                         SUM KA TUAK

Ticket ka book lai khan concert hun 10th May, 2017 kha thla thum chuangin kan la hlat a, kalna tur sum chu ka tuak ve mai ang tih rilru chu pu tho mah ila sum hailuhna hun ka nei mang ta hauh lo.

Ticket ka book hma hian ka chhungte ka rawn a, an rilru 98% chuan an remti lo mahse min hnial fithla țhak lo. Unau zinga naupang ber ka ni a hei vang hian ka nawr na ngam ve em em a ka in ti 'naute' tlat!

May ni 10 a hnai tial tial a, March thla ațangin sum tuak ka tum a khawl ngah erawh a har ngang mai. Ka inhlawhna hmasa berah chuan kan kawmchhak ami te'n an kawmthlang kawng an maia leirawhchan (brick) an hlanthlak chu an inchungah Rs. 600 hlawhin min thiar tir a, a tam lo va tihzia ka ti ngei mai. Rs. 600 ka nei ta phawt JUSTIN!

A hminga Mizoram University zirlai ka nih avangin class kal țhat a ngai a, class kal hunah inhlawh a rem lo va hei vang hian Inrinni leh zan hunah chiah inhlawh theihna hun ka nei. Sum ka tuakna kawngah hian vawithum lai chu cement chawkin hna ka thawk a, rora hlangthla (unload)-in vawikhat Khatla-ah ka inhlawh bawk.

Ka thlenna (Hotel Yadgar, Navi Mumbai)

Cigarette-ah pawh a sei ber leh tlawm chi Farstar zu ve ngat țhin khan Zo zial ka zuk tam a ngai a, cigarette man to zu pha lo mah ila ka zuk țhin Farstar mai mai pawh sum tuak lai chuan to vah vah tak a ni! Ka chhungte laka 'mark' tih țhat a țul tel avangin thla khata ka sum hman pawh a hniam ve viau chuan ka hria a, ka ei pawh a chhiatsa naklaiin ka ti chhe lehzual. Mahse hrehawm ka ti ngai hauh lo va ka hlawhtlin chuan ka hmuh tur kha JUSTIN BIEBER a ni tlat.

Scholarship kan la dawn tih ka hriat bawk avangin ka thla a muang ve fu a, mahse Mumbai thlenpui atan chuan beitham hle tih ka hai bik lo. Ka han belhkhawma ka sum thawhchhuah chu Rs. 2000/- lai alo ni ve a, hei hi chuan Thlawhna (flight)-in Kolkata pawh min thlenpui zo lo.

                   ȚANPUINA KA HMU

A hun a hnai zel a sum lam ka tuak nghah hman loh avangin thulh mai ka rilruk a, lo in sawipawr tawh viau mah ila a dawn hnaiah ka țhulh hmin der. May thla alo herchhuak a, concert hun a thlen hma ni nga (5) la awm chuan kal tum angin rilru ka siam tawh lo va țhiante'n min zawh pawhin ‘Tum ve zel e” chu ka ti liam ve mai zel.

May ni 6-ah rilrua țawngțaina nen chhungte ka be leh a, min phalsak chiah lo chungin min phalsak a ka va han lawm tak em! Mahse keimaha ka zin chhuahna hmasa ber tur anih vang leh Mumbai ka thlen ngailoh avangin fimkhur turin min chah mawlh mawlh thung. (Mizoram pawnah hian vawi tam vak lo chu ka zin tawh a, amaherawhchu mi kaihruaitu emaw kalpui an awm zel.) Keimah hian ka zuam em a, Pathian, ka rilru leh Bieber ngaihsannain Mumbai hi min hruai thleng ka ti lo thei lo.

May ni 6 zan hian buai namenin lovin ka buai ta chiam a, kal loh tuma rilru siam tawh kha ka țhiante pahnih - Eli leh Rohlupuia Hnamte (Rolph)-te'n kal tura minlo nawr leh tak si avangin ka tum veleh ta hmiah mai!

Ka ute ka be kual a sum khawn kualin ka phe zak zak a hlawhtlinna erawh ka hmu hnem lo. Ka u Techhuani'n min puih theih tur thu min hrilh a, mite tan chuan tam lo mahse Rs, 2000-a min țanpui a tiam. Ka lawm a, U neih nawmzia ka hriatchian phah bawk. Ka u hian ka dilna min tih hlawhtlinsak loh ala nei ngailo. Ka unau dangte pawhin sum an neihloh thu sawi mahse min puih an in huam tih an sawi zel a beiseina thar ka nei.

Hetih mek lai hian inkhel.com lama ka hotupa ber Digi Malt chuan sum ka hmuh theihna tur min ngaihtuah sak a ka vannei tak meuh meuh.

Sum ka khawl ve hram hramte, min duhsaktute hnen ațanga ka hmuh leh thildang kaltlanga ka hmuhte nen chuan Mumbai kal ve hram hram chu ka zuam ve ta deuh.

                      GOODBYE AIZAWL

May ni 7 zana Mumbai kalna tur thlawhna ticket ka tifel thei hram a, kan tlai em avangin ticket man alo sang tawh nasa mai a, ticket man hi keini ang chhungkaw tan chuan to tak a ni to tak! Mahse min hiptu khan min hip na em a inthlahrung tak chung siin ka hun țha neih ka hnar phal ngang lo a ni e ka nu, ka pa.

Netaji Subhas Chandra Bose International Airport, Kolkata

May ni 8, chawhnu dar hnih leh a chanveah Lengpui Airport ațangin Kolkata kan pan a, ka flight connecting anih vangin Kolkata-ah zan khat ka riak a, May ni 9 (12:15pm)-ah Mumbai kan thlawk thleng a ka bo nghal chiam!

Chhatrapati Shivaji International Airport, Mumbai chhuahsan ka tumna lamah kawng ka bo va Airport-ah hian darkar hnih chuang teh meuh mai ka hawihai a; vawithum lai Uber ka koh tawh hnu ka cancel bawk. Hetia cancel hian a hnu leha a dang hman dawnin kan cancel man kha chawi ve zel a ngai a, Rs. 200 chuang chu vai țawng thiamloh avang leh kawng hmang hriatloh vangin ka khawhral der.

Ka bo tih an hriatin Eli-i leh Rolph pawh an bo ve nghal hi a ni mai a, kan inbe tawn reng a Uber ka chah hmuhna lai tur (pickup point) ka hre thei si lo va Hindi thiamloh bawk nen khawlum up churh hnuaiah Val hi ka va han buai tak!

Chhatrapati Shivaji International Airport, Mumbai

A tawp atawpah chuan Prepaid taxi ka hmang ta ngawt a, ka pan tur Navi Mumbai thlen nan Rs. 750 ka seng a, "Ka kal lui hi ka tisual mai ang aa...." ka ti rilru rum rum.

Ka thlenna tur horel, Hotel Yadgar-ah ka in dahlut a zanah ka thurualpui, Adheri West lama thleng Isabella-te nen ticket kan va lachhuak a. Ticket ka nei chiah chu ka fawp vawng vawng a, ticket lakchhuahna (BookMyShow)-a lo awm (duty) pathumin min en char char a ka tahkhum lo chauh! Duty zinga hmeichhe pakhat chuan min en paha nui chungin, “Congrats!’ a lo ti a, “THANK YOU!”

Amak em a ni țhiante u. Vawi tam tak Purpose Tour ticket hi Sapho laksa social media-ah ka hmu tawh țhin a, ka kutah a awm ve ka ring ngai lo. Khatih hunlai khan ka hnuk a ulh zia kha zep atan chuan ka ui a ka zak lem lo. 

                 PURPOSE TOUR INDIA

May ni 10 alo ni a, ka țhiannu/ thurualpui Isabella nen concert-na tur hmun DY Patil Stadium, Navi Mumbai chu Auto Rickshaw-in kan pan a khua lah duhthusam aiin a lum bawk.

Kan luhna (entrance) tur a inan loh avangin DY Patil Stadium kianga Cricket khelhna lamah thui zet ka phei a, ticket counter-ah darkar khat chuang ka in tlar ve ran a biak tur an vang ngei mai.

Ka ticket neih kha Silver category anih avangin Silver Ribbon min pe

Chawhnu dar thum pel hretah luh an phal țan a, fimkhur takin lut tur ho min dap a phalloh lah an ngah narawh e. Khawlum uap churh hnuaiah stadium chhung chu ka lut ve a an chei mawi bawk nen khawlum min theihnghilh tir lek lek.

Concert boruakin min tuam zui deuh mai a, DJ Sartek-a'n darkar khat chhung hun a hman hnuin DJ Zaeden-a'n darkar khat bawk hun a hmang veleh a, mahse DJ pahnihte che vel (perform) hi ka en mang lo ve ve a ka en peih lutuk lo hrim hrim bawk. Khua a lum em ema stadium chhung lah Ni (sun) in a hem țha em em bawk si a ka tlin ve lo. Ka kal chhan chu JUSTIN BIEBER a ni a, Alan Walker che vel pawh hmaih ka tum hauh lo. 

Silver category counter

                           I'M FADED......

Sartek leh Zaeden-te'n khawlum hnuaia an tih tur an tih zawk hnuin ni a tla fel a, 'Faded' hmanga khawvel hriatlar Alan Walker hun a thleng ta. Stadium pawn, stadium compund ni si-ah mi che vel enin ka țhu a, khua a har ve angreng hle a Vaiho lah an in ha chhing thei teu teu!

Dawr an siam kual putna bul nuam taka ka țhut laiin Alan Walker rimawi ngei mai alo ri a, keimah mai nilo pawnlama awm vete kan tho suau a stadium chhungah luh kan inchuh. Alan Walker hian a bulțan nan "Faded' ngei mai a han thaikual a, ava han nuam tak em! Ka zuang a ka lam a kan 'Faded' nasa ngei mai!

Alan hian a larpui 'Sing me to Sleep', 'Alone' te pawh a khawih tel a, a hla tharte pawh min hlui a darkhat bawk hun hmangin DJ hmasate pahnih ai chuan mipui a hip khawm hnem fe zawk.

                    LALPA KA LAWM E!

Alan Walker-a'n hun a hman zawh hnuin mi pakhat nghah kan nei a, chu chu kan kal chhan ber JUSTIN BIEBER a ni. Dar riata lo inlan tura an tih kha țan hun an tih khawtlai hret avangin 8:30 ah alo lang thei chauh.

A lo lan hmain rimawi (music) an play a, big screen-ah BIEBER an tilang chuai chuai reng bawk. Mipui kan phusa nasa tawh a 'BIEBER! BIEBER! BIEBER!' tiin ka au rual dual dual.

Tichuan le, music ri riai riai karah 'Mark my words' hmangin kan kal chhan leh kan nghahhleh em em JUSTIN BIEBER chuan India mipui a rawn awi ta! Grammy-a Best Dance Recording Award a dawnpui ngei mai 'Where Are U Now' in a zui nghal a. Zaipuitu aiin lawm vanga țe leh au an tam a, an khek chel chul ni a ni ber e.

Alo lan tirh hian ka au lo va, ka ngawi tlat thung. Ka tumdan angin ka awm thei ta lo. Ka hnuk a ulh a, ka hmuh tirh phat hian 'LALPA KA LAWM E!' tih ka sawi nghal mawlh mawlh a, mitthlaah ka kalloh hlaua theihtawp min chhuahpuitu - Eli, Rolph, U Maltea (Digi Malt) leh U Sangliani-te leh ka innghahna ber ka chhungte ka hmu bawk. Ka hnuk a ulh țeuh a ka biangah mittui a luang ngiang ngiang. Thenkhat chuan 'Pa lo' minlo ti pawh a ni ang, keichuan ka 'Pa' lohna ka hre lo va ka ngaihsan leh hmuh chak ber a ni miau alawm.

'Where Are U Now' a sak zawh hnu hian 'Get Used To It', 'I’ll Show You', 'The Feeling', 'Boyfriend', 'Cold Water' leh 'Never Let You Go' hmangin min awi leh a, 'Never Let You Go' a sak zawh hnu hian a lar tirha amah vawrh em em tu 'Baby' hmangin amah vang kalkhawmte min țhap leh a, hemi hnu hian hla țha tak 'Children' a sa leh a hetah hian Indian naupang pali an lo chhuak a Bieber hian lampuiin mipui lawm an hlawh hle.

'Where Are U Now' hmanga concert a hawn zawh hian thu tlem a sawi a, Mumbai-a concert a nei thei chu lawmawm a tih thu bakah India mipuite a ngainat thute a sawi a, lum ti lutuk lo mahse ni (sun) erawh a danglam hret tih a sawi.

Țingțang (guitar) hmangin 'Love Yourself' leh 'Life is worth living' tih pawh a sa tel a, a hla dang pawh phunrem lovin a sa nual. A phun rem vek ni a an sawi kha a dik lo va, a chanve vel phunrem lohin a sa tih hi a hmuna kalte chuan kan hria a, kan ngaihthlak bakah kan hmu bawk!

Bieber hian concert a khar hmain thu tam vak lo a sawi leh a, chutah chuan, "Zanin hi hun ka hman tawha nuam ber pakhat a ni. Ka ngaina che u a he hmuna ka lokal thei hi ropui ka ti bawk. Ka lokir leh ngei ngei ang."

"Purpose Tour anih angin minute hnih chhung lek hringnuna kan damchhan ngaihtuah tlang ang u hmiang. Hei vang hian Purpose Tour tiin ka vuah a keimaha țha ber pawh a lo la thleng dawnin ka hria. " tiin a sawi.

 Zan dar 9:50-ah concert hi lawmthu sawi chungin a khar zet a, stage a chhuahsan tawh hnuah fans lam atanga ngenna a nasat vangin a lokir leh a, a hla hit "Sorry' hmangin hun a khar a kham lo takin 10:15pm velah Purpose Tour India hi khar a ni.

Concert boruak sawi chakawm viau mahse a thui tawh viau mai a, duhtawk mai ila sawi tur tam tak ala awm.

                            KA VAKVAI 

Concert zawh tuk May ni 12-ah Rel hmangin Kolkata pan tum ka ni a, zan dar 8:30-a rel chhuak tur anih avangin Gateway of India ka tlawh hman a, kum 2008-a mi firfiakte'n an beih Taj Hotel pawh nalh takin Gateway of India kiangah hian a awm.

Gateway of India, Mumbai

Rel ticket hi țhianpa Rolph-a'n AC 2 Tier minlo laksak a, mahse confirm a ni si lo va buaina ka tawk leh ta. Mumbai-ah hian Rel station a awm nual vangin kan ticket neihna hi Mumbai Central ațanga chhuak tur emaw ka ti a, ka pan ve mai bawk. Mahse Mumbai CST atangin a ni tih ka hre leh hnuhnawh a hmanhmawh takin ka țhianpa Uday Akapasu nen SCT lam hi Taxi-in kan pan ka tlai em lo ve.

Uday hi sawizui lawk ka duh a, Mumbai-a cheng niin Indian Football website pakhat Goalbold-a writer a ni ve a, ka kal tur a hriatin a phur em em a, kal dan turte pawh min hrilh nasa hle. A tan hian Aizawl FC jersey (player ho hming sign hnan) ka kensak a, in hmuh thuai tum kha ka haw dawn hnaiah ka hmu ta chauh a cake tui tak min present ve bawk. A fel a, a hnua ka buai hnuah a in luaha thleng mai turin minlo la ngen. Ka lawm tak meuh meuh Uday.

Rel hmangin Mumbai chu ka han chhuahsan tan a, ka ticket a confirm loh avangin țhutna (seat) ka chang lo va Travelling Ticket Examiner (TT) hmuh ka ngai a ka nghak. TT lo thlen hian station pakhat kan pel hman a theihtawpin seat minpe a min chuantir thei turin ka ngen.

Mahse online hmanga ticket book, confirm siloh hi alo hman tlak hauh lo mai a, station-a confirm loh tho ticket lehkha ngei neihloh chuan online-a 'waiting' nihin awmzia alo awm lo chu niin Thane station-ah min chhuk tir a ka vakvai chu a ni deuh ber e.

Thane, Mumbai

Hetia ka buai lai hian ka unaupa neihchhun, Allahabad-a awm mek biakpawh ka tum a phone ala thei reng reng lo. Hetih lai hian an chhungkuain Serchhip-ah an haw a, ka zin hi min ngaihtuah em em a minlo be pawp reng bawk. Mahse hetia buaina ka neihlai tak hian phone call ala thei tlat lo va, ka chhuk hnuah thil awmzia vin hlar chungin ka hrilh. Ka tihpalh Au Mama, ka mangang leh hrilhhai lutuk kha ka thin hi a rim țun si. 

Dai ngailoh ramah ka vak kual a, ka chhungte'n awmdan tur an lo rel a, Eli-i leh Roplh-te'n theihtawpin ka awm zel dan tur an lo ngaihtuah bawk a inkhel.com lama ka thawhpuite'n minlo fuih a kal dan tur minlo hrilh ve reng bawk. In chungah lawmthu sawi sen loh ka ba a, rulh theihna hun ka nei veleh tlanchhe lovin ka rul ang che u. Phut let neiin minpui lo tih ka hria, mahse engemaw tihsak chu in phu thlawt.

Thane ațang hian Mumbai lama kir leh ka tum ut ut hman a, thiante ho pawhin kir mai turin min ngai hman a, inkhel.com kan thawhpui pakhat Hannah Lalhlanpuii pheichuan Rel kaldan zawng zawng minlo thawn hman a, min ngaihtuah tlang takzet. Amaherawhchu ka tumdan ka thlak ta thung. Bangalore lama hnathawk thianpa Rolph-a'n Mizoram House minlo biaksak a, House lam hian zanrei tawh mahse ka thlen an lo remti hlauh a ka thla a muang huai mai.

Rolph-a Uber min kohsak hmangin Mizoram House lam ka pan a ka va bo leh pek! Uber-in House bul nia ka sawiah min chhuk tir a, alo dik lo deuh avangin ka hawihai țan leh ta hle.

Zan a rei tawh a fimkhur a tul tawh bawk avangin Vai nazawng biak ngam an ni tawh lo va mi hmuh tur pawh an khat pharh tawh, Mizoram ațanga minlo ngaihven em emtu ka unaupa neihchhunin minlo be reng a, Hindi a thiam avangin khawlaia Police lo duty chu phone hmangin ka kalna tur ka zawh tir a, ka zawng hmu thei chuang lo.

Stadium pawn lamah dawr an siam a chawlh hahdamna tur nuam tak a awm bawk.

Ka kalna ngaia vawihnih ka kual hnuin dawr nghak in dahfel tur mi pakhat chu thiam ang angin ka zawt tawp mai a, ka bona khawvela a zim ta sawt.

Ka zawh hian Mizoram House awmna building hming (Sun Tower) zawng tawp turin min hrilh a, Google Map hmangin ka zawng leh a, ka kalna ngaiah ka kir leh hnuin zanlai dar 12 pelh fe tawh hnuah Mizoram House ka lut. House-ah hian țha takin minlo chhawn (welcome) a an fel khawp mai.

House-ah hian zan hnih hun ka hman hnuin May ni 13 khan Thlawhna-in Aizawl kan pan a tluang takin chawhma lamah Lengpui Airport kan thleng.

     LAWMTHU SAWINA TUR A TAM

Sawi tawh angin sum lamah harsatna ka nei a, ka kal lama ka thlawhna turin țhianpa Rolph hian Rs. 2000 min tumsak a Thlawhna ticket min laksak bawk. Ka țhiannu, Tata Hosiptal, Kolkata-a thawk mek (tunah chuan Mizoram-ah a awm tawh) Eli-i chungah pawh lawmthu sawi sen loh leh ba rulh sen loh ka nei.

inkhel.com lama kan hotupa U Maltea lakah pawh lawmthu sawi sen loh ka ba a, JUSTIN BIEBER ka hmuh theihna tur hian sum tam min hmuhtir. AIFF reporter leh inkhel.com lama kan thawhpui U Sangliani pawhin theihtawpin minpui a, sum ka hmuh theihna turin theihtawp a chhuah a ka lawm dan hi sawi theihloh khawpa nasa a ni.

A tawp berah chuan JUSTIN BIEBER ka hmuh theih chhan hi PATHIAN a ni a, hun tha leh hriselna te, ka mamawh zawng zawng min pek avangin lawm a, a rintlakzia ka hre bawk. Sawi hmaih thiang lo tawp an awm a, chu chu ka chhungte an ni. Min ngaihtuah a min țawngțaipui a, ninawm khawpin ka pa leh ka nuin min lo be (call) hnem a ka ute pawhin min ngaihsak hle.

Ka unaupa in ka kal hmain kal dan turte uluk takin min hrilh a, vairama khawsa tam anih avangin tih tur leh awmdan tur a hre hnem a ka hlawkpui hle. Ka unaupa hian Thane station-a ka chhuk hnu khan minlo ngaihtuah em em a, alo tlaivar phah deuh țhak tih ka hre leh hnuhnawh a min hmangaihtu chhungkua leh țhian tam tak ka nei hi ka inchhuang a, ka lawm tak meuh meuh.

Min duhsakna leh hmangaihna zawng zawng hi ka rul seng dawn lo che u tih ka hria a, ka theih chin chinah erawh engtiklai pawhin puih che u ka inhuam reng a; Pathian-in malsawm zel che u rawh se.

Purpose Tour India vang hian tawnhriat tam tak ka nei a, midangte tel lo chuan mihring hi alo awm theihloh tih hi ka hre chiang em em bawk a ni.

"Life is worth living, so live another day,
The meaning of forgiveness,
People make mistakes, doesn't mean you have to give in
Life is worth living again."
- Justin Bieber

Purpose Tour India