2014 thlirletna: Twitter-a Football tweet larzualte.

Twitter lam hrechiang vaklo kan awm takin a tlangpui han sawifiah hmasa ta ila:

* Twitter-ah chuan Facebook-a 'share' kan tih hi 'retweet' a ni a.

* Facebook-a 'like' kan tih hi Twitter-ah chuan 'favorite' a ni bawk.

* Twitter-ah chuan Facebook-a 'post' kan tih hi 'tweet' a ni leh thung.

10. Pele: Brazil mai nilo football khawvela hming dai tawh ngailo tur Pele hian World Cup 2014 tan hma khan intihsiakna a tel tur player-te chu an him a duhsak tih a tarlang a, hei bakah hian World Cup chhim tu zawng zawngte chu an hrisel nan leh hlim taka hun an hman theihna duhsakna a hlan thu a tweet. He a Tweet hi mi 8600 chuangin an Retweet (Share) tawh a mi 6400 chuangin an Favorites (Like) tawh bawk a ni.

9. Thierry Henry: Arsenal leh Barcelona striker hlui Thierry Henry hian kumin May ni 12 khan Twitter-ah account a nei ve chauh a, Followers chu maktaduai khat chuang a nei der tawh! Henry hian hetia Twitter-a acoount a neih tirh hian, "Hei hi Thierry Henry a ni. Hei chauh hi ka official Twitter account a ni a heta thil in post apiang chu ka ngaihdan zel a ni ang. Welcome. " tiin a Tweet a, hei hi mi 16,000 chuang in Retweet tawh a mi 7,600 chuangin an Favorites tawh bawk a ni.

8. England: Hei pawh hi World Cup lam hawi bawk a ni. Khatia England coach Roy Hodgson-a'n player 23 awm theihna England squad a han puan khan Twitter-a England official account chuan an tarlang ve thuai a, hei hi mi 24,000 chuangin an Retweet. World Cup khel tur hian beiseina sang tak nen England hian Brazil an pan a, mahse group stage pawh paltlang zo lovin an mualpho.

7. Robin van Persie: Kum tir January ni 25 ami daih tawh kha a ni a, Dutch striker hian Manchester United-ah Juan Mata alo lawm thu ama official Twitter account-ah a tarlang. Hei hi mi 39,000 chuangin an Retweet a, mi 15,000 chuangin an Favorites tawh.

6. Neymar: Brazil leh Barcelona forward Neymar hi World Cup lai khan Colombian full back Juan Camilo Zuniga chuan a hnungzangah na takin a hliam anih kha, khatia an enkawl hnu khan a teammate-te leh an fans-te chungah amah an thlawp avangin a lawmthu sawina Twitter-a ama official account-ah a post (tweet). A tweet chu Brazil tawngin a ni a, "Agradeço as msgs #JOGAPRAELE de todos vocês e dos parceiros da seleção. Agora, peço junto com o Brasil: #JogaPraMim " tih hi a ni. A tweet hi mi  40,000 chuangin an Retweet a, mi 61,000 chuangin an Favorite.

5. Neymar: World Cup laia ami bawk kha a ni a, Brazilian star hian, "Pathianin malsawmin min venghim rawh se." tiin a tweet a hei mi 42,000 chuangin an Retweet a, mi 70,000 chuangin an Favorite tawh.

4. Luis Suarez: Uruguay striker hian Italian defender Giorgio Chiellini a seh avangin ngaihdam dilna Twitter-ah a tarlang a, hei hi mi 70,000 chuangin an Retweet a mi 34,000 chuangin an Favorite tawh a ni.

3. Lukas Podolski: Germany leh Arsenal forward Podolski hian khatia World Cup-a an champion hnu khan a teammate Bastian Schweinsteiger nen thla an lak dun (selfie) chu a post a, hei hi mi 91, 000 chuangin an Retweet a mi 84,000 chuangin an Favorite.

2. Giorgio Chiellini: Italian defender hian Luis Suarez a ngaihdamna thu Twitter kaltlangin a tarlang a, Suarez hi a mention nghe nghe bawk. He a tweet hi mi 97,000 chuangin an Retweet a mi 55,000 chuangin an Favorite. A tweet chu hei hi a ni, ".@luis16suarez It's all forgotten. I hope FIFA will reduce your suspension."

1. Mario Balotelli: Italy leh Liverpool striker hian World Cup lai khan fiamthuin Costa Rica an hneh chuan Britain Lalnu fawh (kiss) a duh thu a tweet a, a bik takin a khabeah a duh thu a tarlang tel. Hei hi mi 172,000 chuangin an Retweet a mi 88,000 chuangin an Favorite.

Super Mario tweet hi football lam hawiah chuan 'Tweet of the Year' a ni.