Kum sawm chuang zet alo liamta. Ronaldo 'The Phenomenon'-in Germany lama goal hlu tak vawi hnih a thun hunlai kha. Hlui tawh viau mahse a lunglen thlak em avang talin an inkhel chanchin kha han tarlang leh ila.
Brazil 2-0 Germany
(Ronaldo 67' 79')
Brazil XI : Marcos, Cafu, Lucio, Roque Junior, Edmilson, Roberto Carlos, Gilberto Silva, Ronaldo, Rivaldo, Ronaldinho, Kleberson.
Subs : Belleti, Ceni, Dida, Edilson, Junior, Kaka,Luizao, Polga, Ricardinho, Vampeta, Juninho Paulista, Denilson.
Germany XI : Oliver Kahn, Thomas Linke, Carsten Ramelow, Oliver Neuville, Dietmar Hamann, Miroslav Klose, Jens Jeremies, Marco Bode, Bernd Schneider, Christoph Metzelder, Torsten Frings.
Subs : Baumann, Bohme, Butt, Jancker, Kehl, Lehmann,Rehmer, Ricken, Asamoah, Ziege, Bierhoff.
A hmun : Yokohama, Japan.
A hmuna entu : 69,029.
Referee : Pierluigi Collina (Italy).
Germany hian an thiampuipa Michael Ballack chu hrem a tawh avangin an chhawr thei lova a aiah Jens Jeremies chu a lut. Brazil lam erawh hi chu an duh angin an dam kim a hrem vanga semi-final khel thei lo Ronaldinho pawh a lut nghal.
Inkhel an tan a Ronaldinho ball khalh phei chu Germany midfielder Torsten Frings chuan a lo khawih per a corner a chawi zui bawk. Hemi hnu minute 2-na ah Kleberson chuan goal thunna hun tha a nei leh a mahse Germany goalkeeper Kahn chuan awlsam takin alo man. Minute 5-na ah he inkhela card hmasa ber chu Brazil player Roque Junior chuan hmuin Germany striker Oliver Neuville ball changlai alo kalh thluk vang a ni.
Germany-in bet zawka tan reng an tum bik lova Bernd Schneider chuan uihawm ang reng takin a pet goal lo. Inhnehtawk takin an khel chho a Brazil chuan minute 18-na ah an nawr let phut a Ronaldinho ball pek tha tak chu Ronaldo-a'n a pet goal lo. Brazil lamin an nawr mah zawk ta zel a Germany tlar hnung chhaih buai fo mahse Germany goalkeeper Oliver Kahn a ding nghet tlat a an paltlang thei lo.
Germany hmatawng Bernd Schneider leh Miroslav Klose-te pawhin an hna an thawk tha viau a mahse goal an hlawh chhuak thei lo thung. First half tawp hma hret minute 45-na ah Brazil striker Ronaldo chuan hun tha hmu lehin Germany goalkeeper Kahn bawk a dingchang leh a tha takin alo beng per hman. First half-ah goal a lut lova Brazil lamin inkhel an thunun mah zawk.
Second half-ah Germany an hlauhawm hmasa a inkhel an tan deuh chiah tihah Ballack aia lut Jens Jeremies chuan tauh goal tepin Edmilson chuan alo dang. Inhnehtawk takin an inkhel chho a goal hlauhawm tam lo mahse inkhel boruak erawh a nung tha a goal venhim aia goal thun tum inkhel an ni bawk a en man hla tak a ni. Minute 67-na ah Brazil lamin goal an thun ta. Rivaldo ball pet Kahn-a lo dan per lo let chu tibuaitu nei lo Ronaldo chuan goal-ah chantir in hma an hruai.
Germany coach Rudi Voeller chuan Jens Jeremies leh Miroslav Klose-te thlakin Oliver Bierhoff leh Gerald Asamoah-te luhtir mahse awmzia a nei tak tak thei lova minute 79-na ah goal an chhuah zui. Ronaldo chuan pet goal lehin he goal an neihna tura Brazil player-te ball in pe kual vel chu a hmuhnawm hle.
Germany lamin goal thun tumin theihtawp chhuah bawk mahse an beisei angin an khel thei lova Brazil lam pawhin goal hlauhawm sawi zui tur em em an nei tawh lova Brazil fans-te chu champion lawmin an lam tan der tawh. Hun pekbelh minute thum a ral hnuin Brazil chu kum 2002 World Cup champion an ni ta a ni.
No comments:
Post a Comment