Jersey number dangdaite.

Jersey number hian pawimawhna a nei lian ve hle a, professional footballer ṭhenkhat zingah pawh number duh bik nei an awm nual mai. Jersey number hi position tinah a hranpaa sem darh a ni lem lo va club emaw, player emaw thuneitute emaw thu ani deuh ber.

'Jersey numbder dangdai' han tih hian a hatute position zir ani mah a, position tinah hian number tih bik awm lo mahse hak tlanglawn bik erawh a awm a. Player-te pawh an jersey number hak aṭangin an khelhna position a hriat theih tlangpui. Thlir ho ila...

Zero (0) - He number hi Aberbeen striker hlui Hicham Zerouali chuan a ha ṭhin a, a chhan chu a hming hnuhnung zawk (last name) tir lama thumal pali hi 'zero' anih vang a ni.

Zero (0) hi season khat chauh hak an phalsak a, Scottish club tan hian kum 1999 leh 2002 inkar khan a khel. Zerouali hi vanduaithlak takin kum 2004 khan lirthei chesualah a boral a, an ram Morocco tan pawh game sarih a khel hman a ni.

Jersey Number 1 -  Goalkeeper number ni deuh bika dah No 1 hi goalkeeper chauh lo pawhin an ha ve tho mai. Netherlands midfielder hlui Edgar Davids khan he number hi Barnet-ah a ha a, kum 2012 October thla khan English club hi player ni chunga manager ni pahin a zawm.

Milan leh Juventus midfielder Davids hian kum 2014 khan inkhelh a chawlhsan a, Netherlands national team tan pawh game 74 a khel hman bawk a ni. 

Jersey Number 2 - He number hi a tlangpuiin defender-in an ha deuh ber a, midfielder emaw forward emawin an ha khat viau mai. Swansea City-a a kirleh hnuin Wilfried Bony chuan No 2 hi a ha mauh mai a, Swansea-a vawihnih a khelhna tih lantirna niin an sawi.

Ivorian striker hian kum 2013 leh 2015 inkar khan Welsh club-ah hian hun a hmang a, kum 2015 January thla khan chhuahsanin Manchester City leh Stoke City tan a khel a, kum 2016 khan Swansea-ah hian a kir.

Clint Dempsey pawhin Tottenham tan a khelh chhungin No 2 hi a ha a, London club-ah hian season khat awmin beisei a pha lo.

United States midfielder hlui hian football-a a hun tam ber chu Fulham tan a hmang a, kum 2007 leh 2012 inkar khan Fulham tan hian a khel a kum 2012 August thla khan chhuahsanin Tottenham a zawm.

Bony leh Dempsey-te bakah hian Arouna Kone pawhin a ha thin a, Ivorian striker hian Wigan Athletic leh Sivasspor tan a khelh laiin No 2 hi a ha.

Jersey Number 3 - Hei hi defender-in an ha deuh ber a, tlarhma lama khel ṭhinin an ha ngai meuh lo. Ghana striker Asamoah Gyan chuan No 3 hi a ha tlat mai a, chhan ṭha tak erawh a nei.

Sunderland striker hlui hian an ram tan a khelh chuan No 3 hi a ha ta ziah a, club-ah erawh a chang reng thei lo. Ghana tana a khelh tirh chuan 13 a ha ṭhin a, a unaupa Baffour Gyan chuan No 3 hi ha turin thurawn a pe. A unaupa thurawn hi ngai pawhmawhin No 3 a ha ta char char a, a unaupa hian 3 a thlan chhan chu Pathiana minung pathum (Pa leh Fapa leh Thlarau Thianglim) vang niin a sawi.

No 3 hi Nicklas Bendtner (LORD BENDTNER) pawh khan alo thlang ve tlat mai. Arsenal striker hlui hian kum 2014 August thlaa Wolfsburg a zawm khan No 3 hi a chang a, tumahin an chuhpui lo. Denmark striker hian kum hnih chhung Wolfsburg-ah hian hun a hmang a German Cup leh German Super Cup-ah vawikhat ve ve a champion pui.

Lord hian Arsenal-ah pawh No 52 ngat a ha ṭhin a, Gunners a zawm tirh lamah No 26 ha mahse a hnuah 52 hian a thlak. No 52 a hak chhan hi a mimal thil vang niin a sawi a, a chhan chiang tak sawi a nei lo.

Jersey Number 5 - Hei pawh hi defender/midfielder nen an inhmeh deuh ber a, Cameroon striker Samuel Eto'o erawh chuan a ngai pawimawh teh vak lo. Barcelona leh Inter Milan striker hlui hian 2014-2015 season khan Everton zawmin No 5 hi a ha.

Milan Baros khan Liverpool-a a khelh laiin No 5 hi a ha ve bawk a, Aston Villa striker hlui hian The Reds hi League Cup leh Champions League-ah vawikhat ve ve champion puiin kum 2005 June thla khan a chhuahsan.

Jersey Number 8 - A zat en mai hi chuan danglam a awm lo va, a hatu zir a ni zawk. Kan hriat lar sa tawh angin 8 hi chu midfielder-in an ha deuh ber a. Kum 2015-a Stoke City a zawm khan Glen Johnson chuan No 8 hi a ha a, defender zingah No 8 ha hi chu sawi tur an tam lo.

Jersey Number 9 - He number hi striker/forward leh midfielder-in an ha deuh ber a, Mexican goalkeeper lar ve thei tak Jorge Campos chuan a ha ṭhin. Campos hian striker angin football-a a zinkawng a ṭan a No. 9 a ha ṭhin.

Goalkeeper-a a inleh hnuah pawh No 9 hi a fo va number 1 a ha ṭhin bawk. FIFA Confederations Cup 1999-a Mexico champui puitu hian kum 2004 khan football a chawlhsan a, jersey rawng ṭial maksak tak tak hak a hrat hle bawk a ni.

No 9 hi Dutch defender Khalid Boulahrouz pawhin a ha ṭhin a, a hakna hi Chelsea-ah a ni. Hamburg defender hlui hian kum 2006 leh 2008 inkar khan Chelsea-ah hun a hmang a, London club-ah hian khelhna hmun a chang lo va kum 2008 July khan a chuahsan.

Jersey Number 10 - En mai pawhin tlarhma lama khel ṭhinte hak lar berte zing ami a ni tih a hriat awm e. French defender William Gallas khan tlarhma lamah khel lo mahse No 10 hi Arsenal-ah a ha a, a dangdai ve hrim hrim.

Chelsea defender hlui hian kum 2006 leh 2010 inkar khan Arsenal a chamchilh a, kum 2010 August thla khan chhuahsanin Tottenham a zawm.

Tlarhnung lama khel ṭhin zingah Galas chauh hi number 10 ha a ni bik lo. Italian goalkeeper Cristiano Lupatelli chuan No 10 hi Chievo Verona tan a khelh laiin a ha a, Chievo-ah hian kum 2001 leh 2003 inkar khan a khel.

AS Roma goalkeeper hlui hian No 10 a hak chhan chu a ṭhian pakhat nen an inchawi vang niin a sawi.

Jersey Number 69 – He number hi France leh Bayern Munich defender hlui Bixente Lizarazu hak ṭhin number a ni a, a ha chhan erawh a ṭha phian thung. Lizarazu hi kum 1969 khan a piang a, 169cm-a sang ni bawkin a rih zawng 69kg a ni bawk. A pian kum, san zawng leh rih zawngah 69 a tel vek avang hian No 69 hi a thlang.

Marseille defender hlui hian football a khelh chhungin nomawi vawi 22 a chawi a, a nomawi chawi zingah hian UEFA Champions League, FIFA World Cup, European Championship leh FIFA Confederations Cup pawh a tel a ni.

Jersey Number 80, 84 & 86 – He number pathum hi player hrang hrang pathum hak a ni a, AC Milan player vek an ni bawk. 2008-2009 season khan Ronaldinho, Mathieu Flamini leh Andriy Shevchenko-te chuan Italian club hi an zawm a, an jersey number atan an pian kum ṭheuh an hmang.

Jersey Number 88 - Celtic-a a khelh laiin Gary Hooper chuan hei hi a ha ṭhin a, kum 1988-a a pian vang a ni. English striker hian Celtic tan kum 2010 leh 2013 inkar khan a khel a, hemi hnu hian club hrang hrangah khel kualin club lian zawm erawh a nei lo. Hooper hian kum 2016 khan Australia a pan a, 2020-2021 season khan Kerala Blasters zawmin Indian Super League (ISL) a khel a hemi hnu hian Autralia lamah a kir.

Jersey Number 99 – Football khawvela hriatreng hlawh tawh tur Ronaldo ‘The Phenomenon’ khan he number hi AC Milan-ah a ha a, football a khelh chhunga a hak lar leh larpui ber chu No 9 a ni thung. Ronaldo Luis Nazario de Lima hian kum 2007 leh 2008 inkar khan Milan-ah hun a hmang a, hemi hnu hian Brazilian club Corinthians-ah khelin kum 2011 khan inkhelh a chawlhsan.

Jersey Number 121 - Digit thum nei ha hi sawi tur an vang viauin a rinawm a, a takah ngeiah thleng ve tawh tlat. Kum 2010 khan World Cup qualifying round an khelh ṭumin Australia midfielder Tommy Oar chuan a ha a, hemi ṭum hian Indonesia an hmachhawn.

121 a hak chhan hi Oar chuan a sawifiah a, Football Federation Australia (FFA)-a an inziahluh tirhin FFA hian number an pe nghal a, thlak theihloh tura an tih a ni. Oar hi an ziahluh tawh zinga 121-na niin amah pawh hian a tirah a hre bik lo a ni.