Michael Laudrup hi Denmark footballer ropui thin a ni a, 'Golden Player of Denmark' leh 'Danish Footballer of All Time' ni thei khawpa player ropui niin inkhelh piahlamah manager atan pawh a hmantlak hle bawk.
Kum 1964, June ni 15 khan Denmark khawpui Copenhagen-ah lo piang a. A lo than len deuh hnuin a pa, Finn Laudrup-a'n a naupan laia a khelhna thin Vanløse-ah football pet ve tanin a pa club hluiah hian a awm. Kum 1973 khan a pa Finn Laudrup chu Brondby IF-ah player/coach-in a awm a, an chhungkuain Bronby-ah hian pemin Laudup-a leh a unaupa Brian Laudrup-te pawh a pa club-ah hian an khel ve nghal. Michael Laudrup hian kum 1976 khan a pa zui lehin an rama 1st division club Københavns Boldklub a zawm a, a unaupa Brian erawh Brøndby lamah a la awm thung.
Senior level-a a zinkawng chu kum 1981 khan a zawh tanin Denmark U-19 team tan kum 1981 February thla khan a khel tan. Youth level-ah Denmark tan game 25 khelin goal 14 a khung hman. Kum 1982 khan Bronby-ah kir lehin a pa (Finn Laudrup) pawhin hetah hian a football zinkawng a ti tawp ve ta bawk. Hemi kum hian Bronby chu 1st Division-ah Laudrup chuan kaipui. Kum 1982–1983 season khan Brøndby tan khelin game 38 khelhah goal 24 a thun a, kum 1982 khan Danish Player of the Year-ah thlan a ni. Kum 1993 khan Italian club Juventus chuan $1 million velin an lei a, an hunlai a Denmark player to ber a ni. Hetih hunlai hian English club Liverpool-in an lalut hman tep nghe nghe a, mahse contract chungchangah an inrem ta lo. Juventus-a a luhtirh hian Juventus chuan ramdang player pahnih Zbigniew Boniek (Poland) leh Michel Platini (France)-te an kawl avangin Lazio lamah loan-in an chhuahtir. Lazio tan hian kum 1983–1985 inkar khan khelin game 60 a khel a goal 9 a thun.
Kum 1985–1989 inkar khan Juventus tan khelin game 102 khelin goal 16 a thun. Juventus a zawm tirh season-ah Serie A champion nihpuiin Intercontinental Cup an chawi bawk a Laudrup hi kum 1985 Danish Player of the Year-ah thlan leh a ni. Kum 1986 chhoah chuan a che tha lova hliamin a tibuai ve ta fo mai. Kum 1987 khan Platini chuan football a chawlhsan a Laudrup chu Platini hmun ruak hnawhkhat tura beisei a ni. Hetih hunlai hian Juventus chuan Welsh forward Ian Rush an kawl bawk a. Mahse Michael Laudrup-a chet chhiat a kaltluang tlat. Kum 1987–88 season khan Juventus tan game 30 khelin goal khat mah a thun lo.
Juventus lama a chet that tak loh avangin Laudrup chuan kum ruk zet alo chenchil tawh Italy chhuahsan lam hawiin kum 1989 khan Spanish club Barcelona-ah a lut a, Netherlands player chuai ngailo tur Johan Cruyff-a hnuaiah team ropui (Dream team) an din chho ta. Barcelona-ah hian Dutch defender Ronald Koeman leh Bulgarian striker Hristo Stoichkov-te nen an vanglai chenin rawlthar Pep Guardiola, Bakero leh Begiristain-te nen game hmuhnawm khawvel hmuhah an pholang. Kum 1991-1994 inkar khan Spanish La Liga-ah rorelin a zawnin an champion. Kum 1991–92 khan European Cup (Champions League) leh UEFA Super Cupah an champion bawk. Kum 1989–90 inkar khan Copa del Rey-ah champion-in kum 1991 leh 1992 khan Supercopa de España-an chawi leh a, Laudrup chu Spain rama Football thiam ber (Best player of the year)-ah vawi hnih thlan hman a ni. Kum 1993–94 season khan an hmelma Real Madrid chu El classico-ah 5-0 in an sawp.
Kum 1993 khan Barcelona chuan Brazilian striker Romário an lalut a, an dan hmanlaiah chuan game khatah ramdang mi player pathum khelh phal a ni. Kum 1994 European Cup final-a AC Milan si li faia an hnehloh tumin Laudrup hi Barcelona squad-ah tel a ni lova (Hei hi an coach Johan Cruyff nen an in hmuh thiamloh vang ni a sawi a ni.). Barcelona-a Michael Laudrup hun pawh a tawp ve nghal. Barcelona a chhuahsan hi fans mai nilo a khelhpui player-te pawhin pawi an ti hle.
Kum 1994 khan Barcelona hmelma kum hlun Real Madrid-ah a lut a. Real Madrid-a a lut hi Barcelona laka phuba lak tum ni a sawi an tam a, mahse Laudrup chuan phuba lakna lam ni lovin chona thar hmachhawn a duh vang niin a sawi thung. Real Madrid a zawm tirh season-ah hian La Liga-ah Barcelona chunga awmin an champion nghal. Hemi season hian Barcelona chu 5-0 thovin an sawp. Spanish league-a club pahnih vawi nga champion pui thei hmasa ber a ni zui. Spanish chanchinbu lar Marca chuan kum 2002 khan Real Madrid kum 100 tlin lawm nan Michael Laudrup hi Real Madrid history-a player ropui 12-na ah an thlang (Vote hi internet atangin fans ho thlak a ni). Kum 2013 April thla khan Marca chuan "Best foreign eleven in Real Madrid's history (Real Madrid history-a ramdang player tha sawm leh pakhat)" an thlan zingah an telh leh bawk.
Kum 1996 khan Real Madrid chhuahsanin Japan club Vissel Kobe-ah a lut a, Vissel Kobe hi Japan Football League atangin division sang zawk J. League Division 1-ah a kaipui nghal. Vissel Kobe-ah hian season khat awmin game 15 a khel hman a goal 6 a thun. Celik Zenica chuan mak tak leh inhnial theih tur takin an lalut leh a, mahse Celik tan hian game khat pawh a khel lo. Football khawvela chuai ngai tawh lo tur Michael laudrup chuan kum 1998 khan Dutch league-a Ajax champion pui chung football khelh a chawlhsan ta a ni. Football a chawlhsan hnu hian Lyngby's Old Boys team-ah a hman chang changin a khel ve thin.
Michael Laudrup hian Denmark tan kum 1982–1998 inkar khan a khel a, game 104 khel hmanin goal 37 a thun hman. A chanchin siamna lemchan (film), ‘Michael laudrup – en fodboldspiller’ chu Danish Jorgen Leth chuan kum 1993 khan a siam.
MICHAEL LAUDRUP CLUB ENKAWLTE -
*2000–2002 : Denmark (assistant coach)
*2002–2006 : Brøndby
*2007–2008 : Getafe
*2008–2009 : Spartak Moscow
*2010–2011 : Mallorca
*2012–2014 : Swansea City
(Hei hi kum 2014 February ni 7 chin a ni.)
CHAWIMAWINA A DAWN TE -
*Danish Player of the Year : 1982, 1985
*Don Balón Award : 1991–92
*European Sports Media Team of the Year : 1994–95
*FIFA World Cup All-Star Team : 1998
*Best Foreign Player in Spanish Football in the last 25 years : 1974–1999.
*Denmarks Best Player Ever : 2006
*Danish Manager of the Year : 2002–03, 2004–05.
PLAYER A NIHLAIA A KHELHNA CLUB A CHAMPION PUINA TE -
*Juventus (Serie A): 1985–86
*Intercontinental Cup : 1985
(Barcelona)
*La Liga : 1990–91, 1991–92, 1992–93, 1993–94
*Copa del Rey : 1989–90
*Supercopa de España : 1991, 1992
*UEFA European Cup : 1991–92
*UEFA Super Cup : 1992 (Real Madrid)
*La Liga : 1994–95
*Dutch Eredivisie : 1997–98 (Ajax)
*KNVB Cup : 1997–98 (Denmark)
*FIFA Confederations Cup : 1995.
MANAGER A NIHLAIA A CHAMPION-NA TE-
*Brøndby -
Danish Superliga : 2004–05
Danish Cup: 2002–03, 2004–05
Danish Supercup : 2002
*Swansea City -
Football League Cup : 2012–13
(Hei hi kum 2014 February ni 7 chin a ni.)
No comments:
Post a Comment