FIFA 15 bihchianna.

Tunlai khawvel games chhuak zinga hlawhtling berte zinga mi a ni a, in tih hlimna nuam tak a ni bawk. Mahni chauha khelh theih anih bakah thiante nen tlaivar thak khawp a khelh ho theih a ni.

Ngaihzawngte theihnghilh thak khawp khel an lo awm anih pawhin dem ngawt theih an nilo.

* Team Management: Squad enkawl dan hi a danglam hret a, mahse buaina tur a awm lo turah ngai ang. Player-te pawh a hma a mi ang bawkin i duh chuan i defensive tirin i attack tir leh thei dawn a, formations pawh thlan tur a awm leh nual ang.

Player-te chanvo (roles) - captain, set-piece leh penalty pet tur pawh mahni duh thua thlan leh theih vek tur a ni a, tactics pawh duh chuan a awmsa (default) emaw i siamchawp ngei i hmang leh par par thei bawk ang.

* Stadiums: FIFA 15-ah hian Barclays Premier League khelmual (stadium) 20 a awm a, FIFA 14-ah atang khan pariat an belh. FIFA team chuan Premier League club tinte stadium hi uluk takin thlalak nen an belchiang a FIFA 15-ah hi chuan a tak tak emaw i ti hial ang.

Mipui authawm leh che vel pawh a ang dawn khawp mai a, ri (sound) hi a tak tak an record an dah. Premier League bakah hian league danga stadium pawh an dah tel leh nual e.

* Emotional Intelligence: Player-te chetdan phung ti mai ila kan fiah tho awm e. Player zawng zawngte hian a hran theuhin khelmuala an awmlaiin zia an nei vek dawn a, hetiang an chetdan phung hi chi hrang hrang 600 an tel thar a khelh a ti nuam viau ang.

Entirnan goal tep a an hmel lan dan te, zai zira inbiak te, goal leh hlauhawm taka an foul-a an hmel hmai landante pawh a ang tawh dawn hle.

* Head scanned: Player-te hi an mahni tak tak ang thei ber tura siam  a ni a. Barclays Premier League player 200 chuang chu an lu hi endik (scan) vek an ni. Player thenkhat phei hi chu an en uluk hle a an khelh apiangin an sam tih kual dan (style)-te pawh an thlithlai tha hle a, a tharlam ber zel hman a ni. Premier League player-te chauh lo pawh hi an lu scan an awm teuh bawk.

* Broadcast graphics: TV-a kan lo en ang mai hian squad list, formations, goal zat in tarna leh sana (time), inkhel leh tur leh player statisctics-te pawh a tel leh thlap dawn bawk a, a hma ai chuan a ang zawk zel ang.

* Audio and Commentary: Inkhel en emaw games khelh hian Commentator/Audio a awm loh chuan a ho ru duh hle a, en leh khelh pawh a nuam lo vek thei. FIFA 15 siamtute hi Barclays Premier League-a inkhel 20 chuang ami mipui authawm leh phusa lai vel an la thlap a, hei hi an thil tel vek a ni. A goal-a authawm leh goal tep a authawm te, hamrik ri leh thawm dangte pawh a tak tak vek a ni dawn.

* Goal Line Decision System (Goal Line technology): Hei hi FIFA games thil thar zinga ngaihven hlawh ber a ni ngei ang. World Cup-ah khan a tangkai dan leh a hnathawhte kan hmu tawh a, FIFA 15-ah pawh i hmang ve thei dawn. Goal leh goal loh hi TV replay hmangin an lo tarlang zel dawn a ni.

# FIFA 15 Ultimate Team (game mode)-ah thil thar a awm.

* Concept Squads: Hei hi mahni in kan duh leh suangtuah ang a squad kan siam theihna tur a ni. FUT player catalogue awmsa hmangin i duh duh i rem khawm thei ang. Transfer Market hunah te, player tha lo thlakna tur zawnna te leh combinations in mil enchhin nan te a tangkai.

* Friendly Seasons: Thiante nen he season hi intumin a khelh theih ang a, statistics pawh felfai taka chhinchhiah thlap a ni ang.

Concept squad leh friendly season bakah hian Loan kalphungah pawh thil thar a awm.

FIFA 15 LEGENDS:

'Legends' han tih hian hranghlui sawina a ni tih chu hre lo va fa kan awm awm lo ve, an ratings a sang thei em em a hman pawh an nuam thei per per hle.

Mahse Legendary hi hmang an awm ngai mang lo, tunlaia kan hriat larte an nihloh bakah an ratings san fal bik viau vang pawh a ni mahna.

FIFA game tikimtu pakhat erawh an ni ve tlat. Tun tumah hian Top 15 kan tarlang dawn a, an chanchin pawh tlem kan sawizui zel ang.

Top 15 ratings:

15. Carlos Valderrama (86): Clombia international midfielder thin a ni a, inkhelh a thiam bakah a larna pakhat chu a lubuk mawi tak vang a ni. Brazilian footballer ropui ni thin Pele chuan kum 2007 hmalama footballer tha a thlanchhuah 175 zingah a tel.

14. Andreas Brehme (86): Germany left winger thin a ni a, kum 1990 World Cup final khan Argentina lamah an champion-na goal a khung. A vanglai chuan player tlanchak tih a hriatlar thin a ni.

13. Jay-Jay Okocha (87): Nigerian midfielder Okocha hi chu hre pha kan la awm nual ang, Bolton Wanderers-ah pawh a khel thin a kum 2008 khan Hull City-ah a khel a hemi hnu hian football a chawlhsan. Nigerian footballer of the year-ah vawi sarih zet thlan a ni a, kum 1994 khan African Cup of Nations-ah Nigeria a champion bawk a club lamah pawh han hlawhchham em em chu a nilo.

12. Brian Laudrup (87): Swansea manager hlui Michael Laudrup-a nau hi a hunlai na na na chuan khawvel hriat ve hat chu a ni. Denmark international midfielder thin ani a Danish Player of the Year-ah vawili thlan niin hei hi Denmark record a ni nghe nghe. Chelsea-ah pawh alo khel tawh thin a club lamah pawh hian a hlawhtling viau a mimal ang pawhin chawimawina a dawng hnem hle.

11. Bobby Moore (88): England international defender hlui Robert Frederick Chelsea "Bobby" Moore hian kum 1993 khan khawvela a zinkawng chu alo zawh zo tawh a, mahse football khawvelah chuan a hming hi hriatreng tur a ni ang. England tan game 108 a khel tling a, kum 1966 World Cup-ah khan a champion pui. West Ham leh Fulham-ah te pawh a khel thin a chawimawina pawh a dawng tlem lo va player hlawhtling a ni.

10. Roberto Carlos (88): Brazil international left-back ni thin hi chu kan la hre deuh vekin a rinawm. Mahse football a chawlhsan tawh a 'Legend' huangah khung theih tawh a ni. Freekick khaw tak taka pet goal a ngah a, Inter Milan, Real Madrid leh fenerbahce-ah te pawh alo khel tawh thin. Mimala chawimawina a dawn leh club lama a hlawhtlinnate chu tarlang lo mai ila mahse Brazil tan game 125 khelin goal 11 a khung tih hi chu tilang hram teh ang.

9. Roy Keane (88): Manchester United captain hlui pawh hi hre lo chu kan tlem viau ang. Kum 1993 leh 2005 inkar khan Manchester United-ah hian a khel a, player hlawhtling tak a ni tih chiah hi a chanchin sawi mai ila. A chanchin leh a hlawhtlindan hi thui taka ziah tham a ni si a.

8. Michael Laudrup (89): A nau Brian Laudrup pawh 12- na ah hian a awm a, hemite unau hi an vanglai chuan lar vet vet tak an ni. Michael hian Ajax, Lazio, Juventus, Real Madrid leh Barcelona tan a khel hman. 'Barcelona dream team' an tiha an mi pawimawh tak a ni a, FIFA 15 legend zinga a tel hi a phu hliah hliah.

7. Laurent Blanc (89): France international defender hlui Blanc hi PSG manager a ni mek a, a vanglai chuan defender tha ber ni a mi tam tak sawi thin a ni. Barcelona, Inter Milan leh Manchester United-ah te pawh a khel hman a player hlawhtling tak chu a ni a France tan game 97 a khel.

6. Alan Shearer (89): English Premier League chanchina goal khung hnem ber ni mek hian FIFA 15 legend-a tel hi a phu mai a ni lova, tel lo ngat se chuan EA Sports hian dem an hlawh zawk ang. Football a khelh chhungin Southampton, Blackburn Rovers leh Newcastle United-ah chauh a khel a, mahse a sulhnu erawh a nep hauh lo. ENgland tan pawh game 63 khelin goal 30 a khung.

5. Emilio Butragueno (90): Spanish striker Emilio Butragueno hian La Liga-ah ringawt pawh Real Madrid vawiruk a champion pui thei a, intihsiakna hrang hrangah pawh a champion pui hnem hle. Spain tan game 69 khelin goal 26 a khung.

4. Peter Schmeichel (90): Manchester United goalkeeper neih tawha ropui ber Denmark international goalkeeper hlui Peter Schmeichel hi hria leh hre lo kan in zat nual tawh awm e. Kum 1991 leh 1999 inkar khan Manchester United tan game 292 a khel hman a, Premier League-ah vawinga a champion pui bawk. Kum 1998-99 season khan UEFA Champions League-ah Manchester United hi a champion pui bawk a, intihsiakna hrang hrangah pawh an champion hnem hle a Denmark tan pawh game 129 a khel hman.

3. Hristo Stoichkov (90): A vanglai hun chu 90 chhoah khan ropui takin alo hmang tawh a, Barcelona leh Parma-ah te pawh alo khel tawh thin. Tunah chuan kum 48 mi ni tawhin Bulgaria tan game 84 a khelhah goal 38 a khung. Kum 1994 World Cup khan Golden Shoe a dawng a, goal khung thei a ni. A hlawhtlinnate hi chu a hranpa a ziah  tham bawk a ni e.

2. Franco Baresi (92): AC Milan tan a inkhelh theih hun chhung zawng a hmangral a, a position chu defender a ni. Milan hi Serie A-ah vawi sarih teh meuh mai a champion pui a, midang ang bawkin a chanchin hi chu a hranpa deuha siam chi a ni. FIFA 15 legend-a a tel hi a phu.

1. Franz Beckenbauer (93): Der Kaiser ("The Emperor") ti meuha a hminglem an phuahsak Beckenbauer hi a position chu Sweeper a ni a, West Germany kulhpui a ni thin. Bayern Munich tan Bundesliga-ah game 427 a khel a, Hamburg-ah te pawh khel thinin New York Cosmos atangin football khelh a chawlhsan. Kum 1974 FIFA World Cup khan West Germany a champion pui a, kum 1972 khan UEFA European Championship-ah pawh a champion pui. Football a chawlhsan hnu hian manager a ni chhunzawm a. West Germany hi kum 1990 FIFA World Cup-ah khan a champion pui leh. Club lamah pawh a inkhelh leh manager anih hnu hian a hlawhtling hle.