A hming pangngai tak hi chu Indian Super League (ISL) a ni
a, mahse Hero company hi sponsor-tu lian
ber (main sponsor) an nih avangin Hero Indian Super League tih a ni thung.
I-League tihlohah chuan India-a professional football league
awm tur a ni. Khawpui hrang hrang pariat atangin club pariat an tel dawn a,
October leh December thla chhunga khelh thin a ni bawk ang.
Mahse league dang kan hriatlar tawh angin point hmu sangber
pakhatna an ni nghal ngawt dawn lo va semi-final atangin final, final atangin
Champion.
KAWNG BUMBOH.....
Thawm nei lian tak Indian Super League hi kum 2013 khan din
chhoh tan a ni a, an tum ber pakhat chu India-ah hian football hi infiamna chi
hrang hrang zinga tih lar ber leh Indian football hi khawvela hmuh a pho chhuah
a tih hmasawn a ni.
Cricket khawvela league lian ber leh ropui ber lawr lak ni
bawk Indian Premier League (IPL), Cricket tournament tho Twenty20 league leh
United States of America (USA)-a an football (soccer) league sangber Major
League Soccer (MLS) kalphung zulzuia duan a ni.
Football league tam zawk angin Tling leh Tla an awm ve dawn
lo bawk a, mahse khelh zel tuma inelna (franchise system) a nih dawn avangin boruak a nep thei dawn lo.
Kum 2010 December ni 9 khan India ram football-a thuneitu
sangber All India Football Federation (AIFF) chuan kum 15 chhung atan Reliance
Industries leh International Management Group (USA) -te'n inremna an ziak a, an
inremna ah hian Vaibelchhekhat za (100 crore) an ziak tel.
He inremna hian IMG-Reliance hnenah thuneihna sang tak a pe
bawk a, sumdawnna lam (sponsorship, advertising, broadcasting, merchandising,
video, franchising, rights to create a new football league)-ah thuneitu ber an
ni.
Thuthang thenkhatah chuan Indian Premier League zulzui hian
league din tum a ni zet a, hetih hunlai hian I-League club neitute leh AIFF
inkarah in hmuh thiamlohna a awm a.
Sawidan dang lehah chuan IMG-Reliance hian I-League hi
Indian Premier League (IPL) leh Major League Soccer (MLS) kalphunga her danglam
an tum tih a ni bawk.
Kum 2011 April ni 25 khan Indian Premier League (IPL)
kalphung zulzuia siam football league chu Indian Football Association of West
Bengal chuan official-in an hawng (announced) a, a league hming hi Bengal
Premier League Soccer tih a ni a kum 2012 atanga khelh tan tura duan a ni. He
league-a khel tur club pariatte hi West Bengal state a mi vek an ni bawk.
An tum danah chuan an vanglaia footballer ropui ni thin
Fabio Cannavaro, Robbie Fowler, Hernán Crespo leh Robert Pirès-te lakluh a ni.
Mahse kum 2012 February thla khan he league an din hi hun ruat mumal pawh awm
lovin sawn (postponed) a ni leh a kum 2013 khan sum lama harsatna awm avangin
tihtawp a ni ta nge nge.
Bengal Premier League Soccer alo zuzi takah chuan AIFF lamin
IMG-Reliance rawtna bawhzui lehin Indian Premier League (IPL) zulzui bawk a
league din an tum leh ta a, hei hi chu kum 2014-a khelh tan theih tur a nih thu
leh India ram pum huap tura an duan a ni.
An thil tum an han puangzar chiah mai chu I-League club lam
in an ngai thei lo nghal hle. I-League club neitu intelkhawm chuan Indian
Professional Football Clubs Association an din ta a, IMG-Reliance hnenah hian
an player-te hawh tir (loan) an phalloh thu leh IMG-Reliance-in inremna an lo
neihpui tawh I-League player-te chungah pawh hremna an lekkawh tur thu an sawi.
Mahse kum 2013 August thla kha chuan IMG-Reliance hian
Indian player an mamawh ang chu an lalut kim tawh ni a tarlan a ni ta tho.
Indian Super League (ISL) hi kum 2013 October ni 21 khan
IMG-Reliance, STAR Sports leh AIFF-te tang kawp chuan an tlangzarh ta a ni.
A tirah chuan ISL hi kum 2014 January leh March thla inkara
khelh turin an duang a, mahse kum 2013 October ni 29 khan kum 2014 September
thlaa khelh tan turin sawn (postponed) a ni tih an puang a, hemi tum hian
Manchester United leh France international striker hlui Louis Saha chu player
langsar (marquee player) Indian Super League-a in ziaklut hmasa ber a ni dawn
tih pawh an tarlang tel nghe nghe.
Indian Super League team a tel tur pariatte hi chhan (bid)
theih turin an siamsa vek bawk a, he hi kum 2013-ah chuan engkim tih chian nise
ti a duan a ni.
India rama sumdawng company lian, Indian Premier League-a
club nei tawh tho mi hausa thenkhat, Bollywood star-te leh mi hausa tam takin an
chhang ta sup sup mai a, kum 2014 March ni 3 thleng chhan theih hnu hi pawhsei
a ni..
Hetia an chhan avang hian sum nei mahse grassroots football
mumal takin an kalpui thei ngei ngei tur tih a ni bawk a, he grassroot football
hi an bial/stadium-ah an nei tur a ni bawk.
Kumin April thla tir lam khan club nei turte puan chian a ni
a, khawpui pariat Chennai, Delhi, Goa, Guwahati, Kochi, Kolkata, Mumbai leh
Pune atangte in thlan chhuah an ni. (Club hrang hrang neitute hi chu team hrang
hrang bihchianna lamah a tel tawh bawk a ti tel tawh rih lo mai ila).
Indian Super League (ISL) khel tur zinga team in phochhuak
hmasa ber chu Kolkata khawpui atanga din leh Spanish club lar Atletico Madrid
nena thawkho Atlético de Kolkata an ni a, kumin May ni 7 khan mipui hmaah an in
pholang.
Kolkata team hian Indian Super League-a coach lakluh hmasak
ber ni tur leh an club coach ni tur chu Antonio López Habas a nih thu July ni 7
khan an puang leh ta bawk.
Kolkata team bawk hian July ni 8 khan Indian Super League-a
player langsar lut hmasa ber ni turin an team-ah hian UEFA Champions League-a
Liverpool lo champion pui tawhtu Spanish striker Luis García a luh thu an puang
leh ta a ni.
Kolkata lamin an player langsar lakluh an puan hnu hian
Guwahati-a hmunpui nei Northeast United FC chuan July ni 16 khan EURO 2008 leh
World Cup 2010-a Spain lo champion pui tawhtu, Villarreal left-back hlui Joan
Capdevila an lakluh thu an puang veleh ta bawk.
July ni 24 khan Indian Super League hian Indian player bikah
draft (lilam na tih mai ila) an nei a, India national team-a tel zingah Subrata
Pal, Syed Nabi leh Mehtab Hossain-te chu lilam zingah hian an tel. He Indian
player draft-na ah hian 24 crore sen ral a ni.
August ni 14 khan Bangalore lam a team din phalna an pek
tawh chu tihtawp sak an ni a August ni 21 khan Chennai lamah pek nghal an ni.
ISL KALPHUNG:
Indian Super League-ah hian team tinte hi khelmual (home)
leh khualmual (away)-in an inkhel kual vek dawn a, a sang zual paliin final
series chu home and away thoin an khel leh ang.
Semi-final paltlangte hian home leh away awm hran tawh lo
(neutral)-in khelmual dangah final an khel ang.
Team tinte hian a tlem berah player langsar (marquee player)
pakhat tal an lalut ngei ngei tur a ni a, ramdang player pasarih an kawl thei
bawk ang.
Hetia ramdang player pasarih an lakluh zingah pahnih hi chu
tlang tak (direct)-in an lalut thei a, mahse midang panga erawh Foreign player
Draft atangin an lalut tur a ni.
Team tinte hian Indian player 14 an nei theuh tur a ni bawk
a, player 14 zinga player 4 chu an khawpui mi (domestic players) an ni tur a ni
bawk.
No comments:
Post a Comment