KA THLIR RENG A

 

Coronavirus (Covid-19)-in kan run chhung a rawn lawi leh tak avangin 23 December, 2021 zan tir aṭangin kan inkhung leh ta pauh mai chu ania. Dan hman laiah ni sawm chhung inkhung tur anih miau avangin zawm loh theih lah ni hek lo. Kan hrehawmna belhchhah turin 29 December-ah ka nu leh pa-in an kai tih khawl hnawksakin a han hmuchhuak leh a, khawlaia ka len veleh theih meuh chuan 11 January, 2022 ani daih tawh dawn. 

Ni 23 zan a liam a, urlawk zan aṭang erawh chuan inkhung hrehawmzia ka va han hrechiang tehlul em! Mi fate khawlaiah an leng a, lirthei nei an tlan zut zut bawk. Chhuak thei ka nih ve loh avangin thik tak chungin ka thlir reng a.

Kawppui nei leh nei lote, kawppui nei mah mahte leh tui thil ti thei lem sek avanga tih danglamte thleng chuan ka awt ngei mai. Kan kawmthlang leh kan inpiah kawngpuiah hlim thawm hriat tur a awm reng a, kei erawh chuan an dinhmun awt takin ka en zel a.

'A rei dawn hleinem hunte chu a kal chak alawm. In dam ang a in lo chhuak veleh thei mai ang.'' tiin ṭhenawm khawveng leh ṭhiante'n min hnem a, a rei leh rei loh ani phiangsen lo a kentel leh liampui kha a uiawm lutuk! He hun atan hian tiin mimal ang pawhin ka lo inpuahchah ve nasa a, ka pum lamte pawh duatin ei tur ṭha ṭha ka hlui. Sum lah theih ang tawkin ka khawl ve a, ka retheih em avangin ka puala Charity Concert siam mai turin kan VC-te ka ngen lo chauh. Ni e, a hun a thleng ta maw tihah engkim vawm bo ang hlauh a ni leh si. Tih theih nei mang silo in khawlaia mi leng vel chu ka thlir nitin a.

Dem tur dap a awl hle mai. Kan khawtlang hruaitute dem ngawt chi ni silo, ka naute pahnih hri kai lah dem chi ni hek suh. A kai ve lo chu min khung ve loh mai awm han ti ila midang tan kan ṭihbaiawm leh tho si a. He hri phiangsen hi chu ka va han haw tak em! Theih nise meivapah chantirin chhem darh ka chak. Min in zawhsan dawn lo mahse mi fate ruala ruih ve ka chak zek zek a, in ve zeuh zeuh e tilo chuan ka chiri lo chauh. Zu heh viau emaw min ti ang e, ka chhuah chak chhan diktak chu ka ṭhiante an nia. Kei hi ṭhian ngaina mi tak ka ni. Chutia in sawh in sawh chung chuan pawnlama mi chetla vel chu ka thlir reng a.

Ngaihzawng ka nei lah ani law, ka lengchhuak ve chak hrim hrim ani Val hi! Phone khawih reng a ninawm si lehkhabu ka han keu a, Ancient India tlawhin Modern India chuangkai mah ila len ka chak tho tho. Games ka han khel veleh zauh thin naa ka chak ber chu L-E-N bawk a ni. Len chak viau chung chuan lengte chu thik takin ka en reng a.

Mahni hma ka sial pawh a nilo, ka lengchhuak ve chak em atin ni. Khawvawt eng ang hnuaiah pawh nise ka leng lo ngai lo Valmawia hi. Tunah erawh min dangtu chu hri a ni miau si a, ka ngaihzawngin len phal lo chu nise hlim takin inah ka tawm sen kur ang. Ngaihzawng nei mang silo hi ngaihzawng nei anga khawsak ka ching leh tlat zel. Valdamrei Khairianga an tih ve mai tur hian Chawngpui Nu Lunglen Tlang phena tlai ni tla tur chu ka thlir reng a.

Thlarau lamah inkhung hi hlawkpui tehchiam lo mah ila ka taksa tan erawh a ṭha viau lawi si a. Lengchhuak thei ta ila sualin min hual leh ngei ang a, ka kawm ngeih leh em em dawn si. Aaa...ka tana khuanu ruat hi hmeichhia nilo in inkhung hi alo nih hi! Taksa hrisel tak chunga pindan ka luah lai chuan khawlaia lengte chuan thawm an nei leh hak zel a.

Kumhlui thlah zan phei chu tawrh a har lehzual. Pawisa chawi leh tlang rel huai huai huama chhuah ruk mai ka duh rum rum. Kawmchhakah 'Ngaiteh kumhlui mual liam tur saw....' tih a zai ruai ruai a, kawmthlang lamah 'Kumhlui aw ding rih rawh....' an lo ti ve bawk nen. Pathian dem maite a awl ta ṭan riau, tihsual kan neih avanga min hremna em ni ang aw tihte ka ngaihtuah thleng a. Chutia hrehawm ti leh pawnlam ngaia ka kiu vawng vawng lai chuan tukverh aṭangin pawnlama mi che vel chu ka thlir zeuh zeuh a.

Hringnun hi ṭahpui theih tak alo ni tihte ka ngaihtuah chhuak kual ta zel a, pindana inkhung bak tih tur awm silo ngaihtuah loh loh turte ka ngaihtuah a (ngaihtuah tur zawk pawh ani zawk maithei). Rilru kawm rauh rauh chung chuan pawnlama hringmi lengte chu ka en vawng vawng a.

Khawvel tan hian engmah hnutchhiah dawn lo mah la pawi ti reng reng suh, a tam zawkin engmah an hnutchhiah bik lo. Het Saala Het! Nupui emaw pasal nei, bialnu emaw bialpa nei, hna ṭha tak nei emaw hausa tak tak emawte pawh hian thihna an hmachhawn ve dawn tho tho. Kan sawi takte khi pakhat mah vanramah an chhawm dawn lo bawk ania ka ṭhian. 'Val to lo' tih hla ngaithlain 'Di tawng lo val kan rui' tih khan han zui nghal se, 'Ka nghei dawn chuang lo' tih erawh ngei ngeiin vawihnih zai nawn tir a ngai leh ang. Hringnun hlimawm theihdan leh a hrehawm theih tho si ziate ka ngaihtuah lai chuan kawlah ni pawh a liam ve ta a.