Bangladesh hockey chanchina lang ve ziah tawh tur Zomuana Ralte (Bangladeshi ho in Jumman Lushai an tih) hi 12 August, 1957 khan Champhai, India-ah alo piang a, a hunpum erawh India ram ṭhenawm Bangladesh-ah a hmang thung.
Bangladesh-a a khawsak chhan hi a pa hna vang ani a, a pa hi Kumpinu lalram hnuaiah khan Assam Police-ah ṭangin Sylhet, Bangladesh-ah dah a ni a. Kumpinu lalramin a awp ramte a chhuah zalen hnu leh, Pakistan laka Bangladesh an in lak hran (independence) hnuah pawh an khawsa zui zel a an inbengbel.
Jumman Lusai hi infiamna thei tak ani a, football leh hockey a khel thiam hle. Hockey-a a zinkawng chu kum 1980-a Bangladesh Police a zawm aṭangin a in ṭan a, kum 1982 khan a vawikhat nan Bangladesh-in an ram tana khel turin an ko va, hetihlai hian Dhaka-a hockey league sangberah a khel.
New Delhi, India-in a thlen 9th Asian Games 1982-ah Bangladesh tan a inlan a, hei hi Bangladesh mipa hockey team tana a khelhna hmasa ber niin a rinawm. Kum 1985 Asia Cup-ah Bangladesh tan sulhnu hriatreng hlawh tur a hnutchhiah a, Iran an hmachhawn ṭumin goal thum (hattrick) a khung a Bangladesh tan international level-a hattrick siam thei hmasa ber a ni.
Defender ni mahse Zomuana hian goal a khung thei em em a, a hlap dik theih em avangin penalty corner-ah pawh a vawtu ber (shot taker) ani ṭhin.
Jumman Lusai hian Seoul, South Korea thlen 10th Asian Games 1986-ah Bangladesh tan a khel bawk a, hemi ṭum hian an team-ah a laichin (cousin) Lalramthanga Fanai (Rama Lusai) pawh a tel. International level-a a game hnuhnung ber chu kum 1989 Asia Cup-ah a khel a, hemi kum Asia Cup hi New Delhi-ah nghah a ni.
Veilam aṭangin - Jamal Haidar, Munna, Jumman Lusai, Liton, Zobel Lusai, Kismat, Mizan, Nammi, Harun, Tisa, Asit. (📸 S Redwan Chowdhury)
Kum 1989 khan World XI an thlan zingah a tel a, Bangladesh chanchinah World XI-a lang thei hmasa ber ani leh bawk.
Jumman Lusai hian club lamah chuan Abahani Limited tan a hunpum a hmang thung a. Abahani tan hian kum sawm chuang khelin tualchhungah vawi tam tak a champion pui a, kum 1994 khan inkhelh a chawlhsan.
Inkhelh a chawlhsan hnuah pawh Abahani tan hian a rinawm reng a, nihna hrang hrang (coach, assistant coach leh adviser) a chelhzui leh bawk.
'Jumman Lusai' emaw 'Hockey Raja' tia an koh hi Bangladesh-ah chuan India hockey player ropui ni ṭhin Dhyan Chand ang maia ropui ani pha a, a hming pangngai Zomuana tih hi an lam pial deuh avangin Jumman an ti ta mai niin a lang.
Jumman Lusai hian kum 2015 January thla khan kum 59 mi niin a hringnun zinkawng a zawh zo va, a boral thu hian Bangladesh a dengchhuak hneh hle. Prime Minister Sheik Hasina chuan Jumman Lusai thihna hi an ram tana channa nasa tak tiin a sawi a, chanchinbu leh television lamahte pawh tarlan a ni.
Jumman hian 16 December, 2014 khan Bangladesh Hockey Federation buatsaih exibition match a khel a, an team chakna goal khungin hei hi Hockey khelmuala a inlanna hnuhnung ber a ni ta.
Zomuana hian Bangladesh rama Sports Award lar tak a dawng pha a, kum 2011 khan Outstanding Contribution to Sports Award hlan a ni.
A ṭhiante leh amah hrechiangtute chuan Zomuana hi mi zakzum rilru ṭha si niin an sawi a, mi tupawh hlim hmel puin a dawngsawng ṭhin. Bangladesh lamah a hunpum hmang mahse a nupui leh fanaute erawh Mizoram-ah an khawsa.
Kan ziahlan tawh Jumman Lusai unaupa (cousin) Lalramthanga Fanai (Rama Lusai) pawh khan sulhnu a nei ṭha ve hle a, football leh hockey khel thei ve ve in Mohammed Sporting Club tan a khel ṭhin.
 |
| Rama Lusai |
Zomuana unau dang Donnon Lusai pawhin national level-ah football leh hockey a khel ṭhin a, a unaupa dang Biyaka Lusai pawhin division sanglamah hockey khel ṭhinin ram tana koh erawh ani ve ta lo.
Zomuana Ralte (Jumman Lusai) hian hriatreng a phu a, an thlah ho hi infiamna lama sulhnu nei ṭha an nih bawk avangin an ngaihsanawm takzet a ni.
 |
| Jumman Lusai leh a ṭhiante |
No comments:
Post a Comment