Naupangte Mamawh Rilru leh Taksa Hrisel

 

Khawvel changkanna kal zelin tunhmaa kan lo tih tawh ṭhin tam tak min hnungchhawn tir a, hei hian mihringte min nghawng na hle.

Hun kaltaah kha chuan naupangten khawlaiah infiamin ṭhian an kawm tam a, zan lamah an pawnto bawk ṭhin. Hei hi hmasawnna kal zelin a rawn hnawt bo chho a, khawpui leh mihring tamna deuhah chuan khawlaia naupang pawnto hmuh tur an awm tawh meuh lo. Hei hi a chhan chu hmasawnna in a ken tel 'Sual' vang ani pakhat a, inruk bo, tualthah, pawngsual leh sual chi hrang hrang avangin khawlaiah naupang kan chhuahtir ngam ta mang lo (A bik takin zanah).

Amaherawhchu khuarel (nature) thil a awm a, mihring tana ṭha tura Pathian duan a awm. Chu chu kan taksa mamawh insawizawi leh rilru lama hmasawnna hi a ni.

Mihring chauh nilo thilnung dangte pawh hian hma an sawnna tur chuan an sen lai aṭangin thil tam tak an zir a, an puitlin hnua an dam khawchhuah theihna tur a ni. Naupangte hian infiam an ngaina a, thil nung dangte kan thlir pawhin an note te an infiam nasa thei hle.

Naupanlai aṭanga infiam tam hi taksa tan chauh nilo rilru lam tan thlengin a ṭha em em a, mihlim ṭawng takin thlarau nun a chawmtel ve bawk. Taksa sawizawi tam leh rilru thianghlim neih hi kan dam khawchhuah theihna atana kan mamawh tam tak zingah a tel.

Sportz Village Schools-in zirchianna an neih 10th Annual Health Survey (2019-2020) ah chuan India rama naupang pathum zelah pahnih chu taksa chak (fit) tawk lo an ni tih tarlan a ni a,  kum 2011 Chhiarpui (Census)-ah khan kum 5 leh kum 7 inkar naupang 330 million an awm a, an zinga maktaduai (million) 220-te chu taksa fit tawk lo an ni. Hetiang zela kan kal chuan kum 2030-ah naupang taksa in fit tawk lo hi maktaduai 250 chuang kan nei thei tihna a ni a, nu leh pate kan pawimawh ngei mai.

Khawvel changkanna kentel zingah hian thiamna lamah hma kan sawn nasa hle a, kan ngainat zawng pawh a dang ta hle. Tunhmaa naupang pawnto hla leh nu leh pate'n an fate hnena an sawi ṭhin thawnthute kha 'Thil hlui' ani mek zel a, ziakin emaw ṭawngka (audio)/video/movie anga kan vawnhim zel a ṭul takzet.

Naupangte an pawnto tlem tial tial a, ṭhian kawma khawlai leng hmuh tur pawh khawpui deuhah chuan an tlem tial tial. Naupangte hi inah kan awm tam tir anih pawhin a theih anga tam an taksa leh rilru kan sawizawi sak tur a ni a, 'A ruhno no chhuakah' tihna khawvelah hian an ruh a no bik lutuk ang tih a hlauhawm.

Naupangte an infiam tlem kan tih hian anmahni naupangte emaw keimahni chiah indem tur erawh kan ni bik lo. Sawrkar kan nei a sikul ṭha tak tak kan nei ṭeuh bawk. He'ng sikul ṭha tak takte hian an naupangte taksa leh rilru sawizawina lam an ngaihsak em tih hi zawhna awm thei ani ve tho. Kan zirlai naupangte hi (sikul tana) result ṭha nei tur ringawtin kan nawr em? Kan zirtirna ṭhat dan (quality) engnge? Nakin zelah tuna kan zirtir hi an hre reng angem? Ramin tuna kan zirlai naupangte hi an la chhawr angem? Zawhna ava tam em!

I rilruin, "Taksa leh rilru sawizawina tur hmanrua/bungrua leh a hmun kan nei tam lo" alo ti maithei e, a tidik chiah. Taksa insawizawina tur chuan bungrua (infrastructure) chauh nilo in zirtirna (coaching) pawh kan mamawh tel. Hei erawh sawrkar hmalak dan a zir anih bakah mipuite inpekdan a zir pawh ani tel thei tho a, mi tinte kan pawimawh.

Naupangte lehkha zirtir ngawr ngawr erawh thil pawi a ni thei a, midang nena in el tirna ṭha lo neihtir pheichu an hmalam hun atan thleng a nghawng ṭha lo tak nei thei a ni bawk. Midang el tura kan duh anih pawhin inelna thianghlim a awm a, chutianga kaihruai zawk tur chu kan ni.

Kan fate emaw kan zirlaite hnenah hna hnuaihnung ni a kan ngaih thawkte kan hmuhsit tir tur a ni lo va, nakin lawka anmahni (hnathawktute) ṭanpui theitu tur an ni zawk tih hi an rilruah kan tuh ngheh tlat a pawimawh. 

Hna kan sawi a, sawizui hlek a ngai. Naupangte hnenah mi zahawm chu an nihnaah ni lovin an hnathawhah an rinawm em tihah a innghat tihte hi kan hriattir tam a pawimawh. Eirukna, inthamna leh induhsakna khawvelah kan cheng ve tawh a, hetiang ti ve duh lo nihte hi a CHANGKANG ani tih hi naupangte chauh nilo puitlingte pawhin kan hriat a pawimawh takzet. 'Vanah lawmman ka tan a awm' tih hla sa ṭhinte hian vanah lawmman kan dawng pha angem?

Boston Consulting Group (BCG)-in zirchianna an neihah chuan India mipuite'n faina leh zirna lamah hma kan sawn hle tih an tarlang a, khawpuia cheng zinga 57% chuan hriselna leh thianghlimna lam thilah sum an seng hnem hle tih an tarlang tel bawk.

Faina leh zirna kan ngai pawimawh telh telh a, hetih lai hian kan taksa leh rilru pawh hian fai leh hrisel a mamawh tak meuh meuh. Ei leh in kan ngai pawimawh a, taksa sawizawi kan hlamchhiah leh si chuan a inbuk tawk (balance) thei dawn lo. Kan taksa kan sawizawi tam loh chuan thau chhia kan ngah ang a, ṭhenkhat dul a kiar ang a tam takin zunthlum leh natna dang an nei zut bawk ang.

Naupangte inah kan khung tam a, pawnah kan chhuahtir tam lo. Ṭhalaite zinga mahni nunna lak (suicide) a hluar em em a, nu leh pate hian kan fate hi kan hriatchian ava ngai em!

Nizan lawka hlim hmel em em kha a tukah chuan alo in khaihlum reng thei a, a chhan chu kan hmuh theihloh rilru hahna emaw rilru natna alo neih theih vang a ni. Nu leh pate mai nilo sikul lama zirtirtute pawhin kan zirlaite kan enkawl thiam a ngai a, an zawhloh phurrit kan siamsak ang tih a hlauhawm.

Chhungkuaah chuan titi tam leh Pathian biakhote a ṭangkai a, sikul lamah pawh zirtirtute'n an zirlaite an hriatchian a ngai.

In lamah Mobile Phone emaw Computer kan khawihtir tam a, pawnchhuah ai chuan a thlanawm zawk ni a kan hriat vang pawh ani mahna. Amaherawhchu internet aṭang hian thil ṭha aiin thil ṭha lo a chhuak hnem a, naupangte pawhin an lachhawng (copy) zung zung thei. Kan thil entir leh an ngaihven zawngte hi kan hriatpui a pawimawh a, min chawimawi theitu kan fate hi zahna kawna min hnuklut theitu an ni ve tho tihte hi kan theihnghilh mai a hlauhawm. Kan lenchhuahtir lo anih pawhin in lam hna hautak lo tak tak zirtir theih an ni a, an zirlaibu kan ngainat tir thiam pawh a ngai. "Naupang chu a kalna awm kawngah chuan zirtir ula, A upat hun pawhin a thlah lo vang” (Thufingte 22:6).

In lamah kan khung anih pawhin theih ang anga an taksa sawizawi tir an la ngai cheu va, an taksa a chak tawk loh chuan an hmalam hun atan a pawi thei. Hmanrua kan nei ṭha tawk lo anih pawhin an taksa tih chak theihna turin hma kan la tur a ni a, an taksa a chak ṭhat chuan an zirlaiah pawh hma an sawn ngei ngei ang. I fa khan ei tur hrisel, rilrul hrisel leh taksa chak ṭha tak a mamawh tih hi theihnghilh ngai suh. Zingah emaw tlaiah i insawizawipui ngai em? I tihpui hman lo anih pawhin amaha ti turin hrilh tal rawh. Titipui tam la, a harsatna sutkian sak tum la, a tan i awm reng tih lantir la, rin ngam i ni tih lantir fo la, engkim a hrilh ngamna ni la, a tana entawntlak nih tum bawk ang che. I fate nen inzawmna ṭha tak in neih chuan in inchhungah nui ri hriat tur a tam dawn a, mite awh em em chhungkaw hlim in nei dawn bawk ani tih hi ka tiam ngam a che.

Kan fate leh kan naute hian kan nunphung leh khawsak dan hi kan hriatlohin an thlir reng a, puitling zawkte hian kan fate leh kan naute tana entawntlak nun kan neih hi a pawimawh mai ni lovin a ṭul takzet zet. Mahse thu pakhat ka chah duh che, I fa kha a duh apiang i tihsak erawh chuan engtikah mah I tilawm ngai lovang.