Football leh Politics

 Football khawvela thuneitu sangber, Federation Internationale de Football Association (FIFA)-in football leh politics chawhpawlh an duh lo va, khelmual chhungah ngat pheichuan an khirh thei viau mai. FIFA hian football-a politics senglutte an ngei thei lo va, mimal, pawl leh ram ang pawha hrem an nei hnem tawh.

Kum engemaw zat chhung chu FIFA hian politics lakah football venhim tum mahse sawiselna tur an awm ta zeuh zeuh a, an famkim bik lo tih a hriat. 

United Nations (UN) ai pawha member ngah zawk hian club, player, team leh fan-te'n football kaihhnawih nilo tarlan emaw auchhuahpui emaw an khap a, ramri khauh takin an thlung.

                                  HREM TAWK AN AWM FO TAWH

Kum 1997 khan Union of European Football Associations (UEFA) chuan Liverpool forward Robbie Fowler lakah hremna lekkawhin £900 an chawitir a, English forward hian Cup Winners’ Cup-a goal a khung ṭumin Liverpool lawng chawlh hmun (dock)-a thawkte nawrhna a thlawp tih a pholang. 

Kum 2009 khan Sevilla striker Frederic Kanoute chuan Deportivo La Coruna laka goal a khung ṭumin Palestina a thlawp tih lantirna a kawrah a pholang a, Spanish Football Federation chuan Kanoute chetdan hi an dan kalh anih avangin €3,000 an chawitir.

Mali striker hi fans tam takin an fak a, Spain-a Palestine Embassy pawhin an fak hle. Israel ambassador, Spain pawhin Kanoute khawsak danah hian sawisel tur a awm lo tih a sawi a, tharum thawhna ti punlun thei chi a nilo tih a sawi. Kanoute hi Lyon, West Ham leh Tottenham-ah te pawh a khel tawh ṭhin.

Kum 2013 November thla khan Croatian defender Josip Simunic chu khelmuala Nazi au hla a hman avangin thla sawm chhung inkhel thei lo va hrem a ni a, Hamburger leh Hoffenheim defender hlui hian World Cup 2014 a khelh theihloh phah nghe nghe.

Kum 2014 khan Argentina FA lakah FIFA chuan hremna tichhuakin $31,887 an chawitir a, hei hi a chhan chu Argentina fan-te'n Slovenia an hmachhawn ṭumin “Las Malvinas son Argentinas” (Falkland hi Argentina ta a ni) tih au hlaah an neih vang a ni a. Falkland hi United Kingdom leh Argentina ram inchuh niin indona pawh a chhuah phah tawh a ni.

Kan tarlan takte hi hrem tawh zinga lar zual deuhte an ni a, FIFA chauh nilo UEFA leh ram hrang hranga football association-te pawhin football leh politics a inchawhpawlh lohna turin dan khauh tak an nei ve bawk.

Football leh politics hi kalkawp thiang lo tura siam ni mahse tunhnaiah a inpawlh nasa chho hle a, hrem tawk miah ta lote pawh an awm.

Kum 2021 tir lamah khan World Cup qualifying round an khel ṭumin Norway leh Germany national team-te chuan World Cup 2022 thleng tur Qatar demna thuziak an tarlang a. Qatar hian football inkhawmpui an thlenna tura an inpuahchahnaah an hnathawkte an ti rethei hle tih sawi a awm a, nunna chan phah pawh an awm nual niin thuthang a awm.

Norway leh Germany thuziak pholan hi FIFA dan kalh ni mahse hrem an ni lo va, thuchhuah an siamah chuan hremna an lekkawh dawn lo tih a ni.

Football danpui Laws of the Game-a Law 4-ah football leh politics chawhpawlhte chunga thuneihna lekkawh theihna ziakin a awm a, amaherawhchu hei hian hremna lam ai mah chuan thil dik ti tura inzilhna lam a hawi thung.

Kumn 2016 khan FIFA chuan England, Scotland, Wales leh Northern Ireland-te'n an jersey-a Armistice day puala pangpar (poppy) an tar chu duh lovin pawisa an chawitir a, Football Association of Ireland pawhin British laka an hel kum za (100)-na lawm nan an jersey-ah chhinchiahna an tarlang a, €4,669 chawitir an ni.

               

        FOOTBALL LEH POLITICS HIAN INZAWMNA A NEI EM?

Dan khauh tak neiin hrem pawh nei tawh mahse football leh politics hi lak hran theihloh ang maia inzawmna nei an ni ve tho mai. Kan thupui hi ‘Football leh Politics’ tih ni mahse infiamna dangah pawh politics hi a inrawlh lo bik hauh lo.

International football hi kum 1920 leh kum 1930 chho va inṭan a ni a, hetih hunlai hi Indopui Pakhatna boruak ningkhawng awm lai leh Inopui Pahnihna in mung chhoh lai a ni. Adolf Hitler (Germany), Benito Mussolin (Italy) leh Joseph Stalin (Soviet Union)-te ho vanglai niin anni hian ralthuam hmang chauhin khawvel thunun an tum lo va, infiamna thil tih theihzia hriain an hmang ṭangkai hle.

Infiamna hi an ram mipuite hnehna atan an hmang nasa em em a, kawng hrang hrangin mipui thlawpna an neih theihna tur an zawng.

Kum 1936 Olympics kha Berlin, Germany-ah nghah niin Adolf Hitler khan a hmang ṭangkai em em a, Nazi ngaihdan thehlar nan a hmang a, mipui thluak suk tumin hma an la nasa hle. Nazi hian an chanchinbu siam ‘Volkisch Observer’ an sem a, hetah hian Juda ho hmuhsitna leh endawng tura mipui fuihna thu an ziak.

Berlin 1936-ah hian Nazi hovin Juda infiammite tel an remti lo va, an tellohna turin theitawp an chhuah. Juda ho dodal viau mahse Germany tan hian Juda hmeichhiate chu tui inhleuhsiakah an tel hram a, ramdang atanga Juda mi tel thei tam tak pawh Nazi ho avang hian thlanloh an ni bawk. 1936 Olympics hi ‘Nazi Olympics’ tite pawhin an sawi ṭhin.

Kum 1986 Olympics-ah pawh United States infiammi Tommy Smith leh John Carlos-te chuan African-American ho laka hleilenna nasa lutuk an dodal tih lantir nan kutkawr dum bunin ban an phar a, 1986 atanga kum 48 a liam hnuah pawh ala reh loh avangin Colin Kaepernick chuan Smith leh Carlos-te sulhnu chhuiin National Football League (NFL)-a hnam hla an sak laiin a  ṭhing ṭhi.

Cricket World Cup 1975-ah pawh Sri Lanka leh Australia inkhelh laiin khelmuala tlanlut a awm a, hei hian Sri Lanka-a Tamil ho hnuaichhiah an ni mek tih khawvela hmuh a pholang.

Khawvela club tam tak hi politics hrinchhuah tih theih a tam a, sakhua leh hnam ang zawnga din pawh sawi tur an tam.

Kum 1911 khan Mohun Bagan chuan East Yorkshire Regiment an hneh a, Kolkata club hi India-in Kumpinu laka zalenna a neih theihna tura chhinchhiahna pakhat a tling.

Kum 1920 khan Bengal khawchhak lama awmte chu Mohun Bagan tan khelh an phal lo va, player leh staff lungawilote chuan Bagan hi chhuahsanin East Bengal an din. He club hi Bengal khawchhak lama aṭanga khawthlang lama pemte tana din a ni a, Bengal ṭhen hran (Partition of Bengal) anih hunlaia thil thleng a ni.

East Bengal-in Indian Super League (ISL) luh tuma sum an tlakchham lai pawh khan West Bengal Chief Minister Mamata Banerjee a inrawlh a, Red and Gold hi sum an hmuh theihna turin hma a lakpui.

Spain lamah pawh Real Madrid leh Barcelona in huat em em chhan hi khelmual chhunga thil thleng vang chauh a ni lo va, pawnlam boruak vanga in hua leh in mil lo em em an ni zawk mah aa, an ngaihdan leh kal dan a thuhmun thei lo.

Real Madrid hi Spanish nationalism nena hmehbel an ni a, Barcelona hi Catalan nationalism nena inzawm tlat an ni ve thung. General Franco-a'n Spain-a lal a hrawt lai khan Real Madrid hian duhsak leh lawm an hlawh a, Barcelona hi an beih nasat ber niin an tum deuh chawt a ni ber mai. Hetiang boruak hi anih nuaih avangin Barcelona hian an club thupuiah 'Mes que un club' (Club aia nasa zawk) tih an hmang.

Catalan hian Spain atanga indan an duh a, thawm nei deuh hat ṭhin mahse an duhdanin engkim a kal vek lo va boruak erawh tun thlengin a inmung reng. Hetianga boruak an lo neih tawh avang hian El Clasico pawhin ngaihven a hlawh em em a, Real Madrid leh Barcelona an in hmachhawn tawh chuan Spain ramah inkhel en avangin kawtthlerah mipui veivak hmuh tur an awm lo an ti hial ṭhin.

Scotland lama club inhal em em Celtic leh Rangers pawh hi ui leh ar thlun pawlh ang maia in ngaih lo leh in tei thei lo an ni ve bawk. An ni pahnih inkar hi nihna/inanna (identity) chungchangah a ni a, an pahnih inkhel hi a hmingah Old Firm Derby vuahin boruak a ṭang thei at at hle.

An sawidan chuan Celtic lam hi Irish Roman Catholic kal zel an ni a, Rangers hi Protestant lam niin British lalram thlawptute an ni thung. Celtic lam hi chuan British lalram an dodal a, Ireland inzawmkhawm lehna an au hla ber a ni.

Croatia-in zalen an sualna kawngah pawh football hnuhluh a ni a, Dinamo Zagreb (Crotian club ni ta) leh Red Star Belgrade (Serbian club ni ta) inkhelh ṭumin khelmualah buaina a chhuak.

He inkhelah hian Dinamo captain Zvonimir Boban chuan inkhel enkawltu referee a pet a, referee hian an club ṭantute lakah hleilenna a lantir niin an sawi. Tunhma chuan Croatia, Serbia, Slovenia, Macedonia, leh Bosnia & Herzegovina-te hi Yugoslavia tia invuahin ram khatah an awm ho ṭhin a, kum 1980 aṭang khan keh darh ṭanin Croatia leh Slovenia hi kum 1991 khan an indang.

Croatia-in zalenna an sualna kawngah hian football-in nghawng a nei thuk hle tih a hriat a, an president hmasa ber Franjo Tudjman chuan ralthuam hmanga indo aiin football-a hnehna chanin hnama chianna a tilang zawk niin a sawi hial a ni.

                                         TUNLAI BORUAK 

Hun hmasa lamah football leh politics hi inchiahpiah mahse FIFA chuan a ṭha lo tih hriain an khap a, sawi tawh angin football khawvela thuneitu sangber changrel hi a fuh reng bik lo.

Kum 2017 khan Qatar national team chuan an t-shirt-ah Emir Sheikh Tamim bin Hamad Al-Thani thlalak chuanna an dahtel a, Hamad Al Thani hi kum 2013 aṭang khan Emir of Qatar a ni a, ‘Emir’ hi an rama lalber leh thuneihna engkim chelhtu a ni.

Kum 2010 chhoah khan Saudi Arabia, Egypt, Bahrain leh United Arab Emirates (UAE)-te chuan Qatar hi enhran tumin hma an la a, hei hi Qatar football-ah sengluh niin FIFA hian $51,800 an chawitir a, Qatar forward Hasan Alhaydos chu a hranin $5,180 an chawitir bawk. A hranpaa an hrem chhan hi a khawsak dan a uchuak bik vang niin an sawi.

Kum 2020 alo nia a, United States police kuta boral George Floyd boruak kal zelah midumte thlavang hauhna in khawvela tuam a, Black Lives Matter (BLM) tih thupuia hmangin midumte'n an vunrawng avanga hmuhsitna an tawh ṭhin chu dodalna a nasa hle. BLM hian football pawh a kal pel bik lo va, khawvel hmun hrang hrangah club leh player-te'n an thlawp tih an lantir.

German Bundesliga chuan BLM an thlawp tih lantir nan au hla an nei a, English Premier League (EPL)-ah pawh inkhel ṭan hmain player-te an ṭhingṭhi a, midumte enhranna an dodal. BLM-in football a luhchilh rual hian thlawptu leh tul tilo a awm ve nghal a, fans ṭhenkhat chuan an player-te an 'boo' hluah hluah a ṭhenkhatin thawm dang an nei fo bawk.

FIFA President Gianni Infantino chuan BLM an thlawp avangin player-te'n hrem an phu lo va chawimawi an phu zawk tih a sawi a, a ṭha lam hawi anih chuan football-ah tupawhin zalenna an neih thu a sawitel bawk.

Thenkhata an khirh viau laiin ṭhenkhatah chuan an nem leh viau ang lawi a, hei hian sawiselna a ti tam hle a, rualkhai takin thuneihna hman a ni ṭhin niin a ngaih theih.

Arsenal leh Mesut Ozil inkar boruak ṭha lo awmah pawh politics a inrawlh a, German midfielder hian China rama Uighur Muslim-te'n tihduhdahna an tawh mek chungchang tarlangin Gunners hi an lungawi lo hle.

London club hian thuchhuah siamin Ozil lakah an inlak hran thu an sawi a, an club leh politics in hnim hnai tur an duh lo tih an sawi.

China-ah hian Islam sakhaw vuan maktaduai sawm vel angin an chhut a, an zinga maktaduai khat chu China sawrkarin khunghranna an siamah hrehawm takin an awm mek niin an sawi. Uighur Muslim-te thlavang a hauh avanga en hran a tawh lai hian club-ah pawh Ozil hi a tlatlum tawh lo hle a, kum 2021 January thla khan chhuakin Turkish club Fenerbahce a zawm.

Kum 2021 May thla khan Leicester City player - Hamza Choudhury leh Wesley Fofana-te chuan FA Cup final-a hnehna an chawi hnuin Palestinian flag an pholang a, Israel nena buai reng Palestina mipuite an thlawp tih an lantir.

FA chuan Foxes player pahnih lakah hian hremna an lekkawh lo va, Palestina mipuite a thlawp tih lantir vetu Arsenal midfielder Mohamed Elneny pawhin hrem a tawk lo.

Kum 2022 lo herchhuakin Covid-19 a hnawt bo lo va, khawvelah chanchin ṭha lam aiin chanchin lungchhiatthlak hriat tur a tam zel zawk bawk. 24 February, 2022 khan Russia chuan a ram ṭhenawm Ukraine runin an thuhnuai a dah a tum a, hemi nghawng zingah hian football pawh a bang bik lo.

Russia khawsak dan hian khawvel (a bikin khawthlang ramte) a ti lung nilo takzet a, Russia hrekna tichhuakin infiamna pawh na takin a sawinghing. FIFA leh UEFA chuan an hnuaia intihsiaknaah Russia national team tel an khap a, infiamna hrang hranga pawl indinte pawhin Russian infiammite an enhrang ve nghal sap sap bawk.

Buaina a chhuah rual hian Ukrainian football tihtawp nghal a ni a, football club, fans leh player hrang hrangin Russia demna thu tichhuakin rilru erawh a thuhmun vek lo.

Politics nena inhnim hnaih duh ngai lo FIFA leh UEFA-in Russian football an hrem a, hei hian football fan-te hmun hnihah a then hrang nghal hmak. Football fan tam takte'n Middle East tana auchhuakte dem an nih laia khawthlang sawrkar chetdan thlawp zawnga FIFA a kal hi an dem a, ngaihdan a hrang nuaih ani ber e.

Uighur Muslim tana auchhuak Ozil enhrangtu Arsenal pawhin Ukraine mipuite an thlawp tih an lantir a, Vladimir Putin kaihhruai Russia an dem.

Russia-Ukraine buaina vanga Russia infiammite'n an tuar hi ṭhenkhat chuan an hrethiam lo va, ṭhenkhat chuan an ram sawrkar tuh rah an seng tiin Russian infiammite hi an ṭan chuang lo.

FIFA thutlukna vanga lungawi lote hian tunhmaa thil thleng tawh nen an khaikhin vang a ni a, dem ngawt thei pawh an ni lo va Russia khawsak dan an thlawp tihna lah a ni hek lo. An vui chhan ber chu intluk tlanna awm loh lutuk vang a ni zawk.

Kum 2013 khan UEFA chuan Celtic lakah hremna lekkawhin pawisa an chawitir a, hei hi an fan-te vang niin Palestina an thlawp tih an lantir. Scottish club hian Champions League qualifying round-a Israeli club Hapoel Be’er Shev an hmachhawn ṭumin Palestina hnam puanzar an vai suau suau a, ram buai vanga harsatna tawk Palestine mipuite tan pawisa an khawn sak bawk.

An fan-te’n politics rawngkai an pholan avangin UEFA chuan Celtic hi £8,615 an chawitir a, an fan-te hian £130,000 an hmuchhuak.

Engpawh chu nise FIFA hi sawisel bo a ni lo tih chu eiruk thubuai an neihah khan a chiang em em a, an president ni lai Sepp Blatter a ban phah a, kum ruk chhung football-a inhnamhnawih thei lo turin hrem a ni nghe nghe.

Kum 2021 khan FIFA chuan tiam chin awm lovin Pakistan Football Federation (PFF) a suspend a, an pawmpui chin nilo an inrawlh vang a ni. Pakistan Supreme Court-in a ruatte'n PFF hi enkawl tumin FIFA Normalisation Committee an hnehchhuh a, Supreme Court hian kum 2018 khan PFF hruaitu tur hi thlangin FIFA pawmpui a ni lo.

Hetiang chungchang vang tho hian kum 2017 khan PFF hi suspend an lo ni tawh a, Pakistan football-in a tuar tak meuh meuh.

PFF ang bawk hian Chadian Football Association (FTFA) lakah pawh FIFA hian hremna an lekkawh tawh a, kum 2017-ah tho khan niin an suspend. FTFA-ah hian Chad sawrkar inrawlhin an ram football hruaitu tur anmahni thuin an thlang a, FIFA-in a pawmpui thei lo va an danpui kalh tlat a ni.

                                       INDIA DINHMUN

India ramchhung ngeiah pawh infiamna leh politics inchiahpiah nasat zia kan hria a, infiamna pawl hrang hranga an hruaitute zingah politics-a mi challang tak tak an ther fur. Politics hian thil a tih thei a, infiamnaah a inrawlh nasat em avangin a thiam leh ṭha aiin duhsak hlawlhin thlan an hlawh ṭhin.

Indian football chauh nilo infiamna hrim hrima politics inrawlh nasat zia hi sawi tur a tam sawi sen lah a ni lo. Kan thlunzawm ta zawk emaw tih mai tur khawpin an inchiahpiah a, inṭhen thei lo ang mai an ni ta.

International Olympic Association (IOA) chuan kum 2012 December thla khan Indian Olympic Association (IOA) an suspend a, hei hi a chhan chu IOA hruaitu inthlannaah sawrkar a inrawlh vang a ni.

IOA inthlannaah hian eiruk thubuai nei an tel a, dinhmun ṭha ṭhaah thlan ni bawkin IOC dan a kalh tlat. IOC hian hmelhemna nei tawh tan an pawlah kawng an hawng lo va, IOA inthlan pawh hi pawmpui duh lovin hremna an lekkawk.

India infiammite’n an tawrh nasat hmain IOA hian sawrkar nena ṭangkawpin hma an la a, kum 2014 February thla khan IOC hian India an hremna hi an hlip thei ta hram a ni.

Football, Cricket, Tennis, Kabaddi, Hockey leh thildangah pawh politics a tel vek a, a zung hi nghet taka a inphun tawh avangin karchhuah chu a harsa viau tawh ang. Board of Control for Cricket in India (BCCI)-a an hruaitute en hian politics inrawlh thuk tawh zia leh dodalna a nepzia a lang a, football pawh an bang bik lo.

All India Football Federation (AIFF) hian kum 20 chhung Priya Ranjan Dasmunshi an hrawn a, Indian National Congress sawrkarna hnuaia Union Minister ni ṭhin a ni. Dasmunshi hi politician tho Praful Patel chuan 2009 khan a thlak a, sawrkarna chang apiangin AIFF hi an thunun ani deuh ber. Patel hian Congress sawrkarna hnuaiah khan Minister of State for Civil Aviation a chang a, Nationalist Congress Party mi leh sa niin Maharashtra MP (Rajya Sabha) ani mek.

India Supreme Court chuan Patel hi Tomir thla khan an paihthla a, AIFF enkawl lailawk turin Committee of Administrators (CoA) an din nghal bawk. CoA hi FIFA chuan pawn lam mi nia ngaiin an ngaithei lo khawp mai a, Thitin thla khan kar khat chhung vel AIFF an hrem.

CoA thiah anih hnuah AIFF hian hruaitu thar an nei leh tawh a, India goalkeeper hlui Kalyan Chaubey chu President thar atan thlan tlin a ni. Kalyan hian inkhelh a chawlhsan hnuin politics a luhchilh a, Bharatiya Janata Party (BJP) zawmin inthlan pawh a chuh ve nual tawh. AIFF hruaitu thar zingah hian politics-a tawnhriat nei tawh an thahnem leh viau mai a, an kal kawp lo thei lo ani ta ber mai.

Sawilan tawh angin politics leh infiamna hi an inkawp char char tih theih a ni a, engtiklai mahin an inhlat tak tak ngai lo. Football pawhin politics hi duh lo viau mahse an thlah thei chuang lova, politics lahin kalsan a tum bik silo.

Eng pawh thlengin eng pawh tawk ila, 'Ruahmanna ṭha a pawimawh a, umzui loh erawh mualphona a ni.' tih hi kan hre reng dawn nia.