ARSENE WENGER LEH HNEH THEIHLOH ARSENAL (INVINCIBLES)

                          

Hun leh kum hi a liam chak khawp mai a, 'Hun leh tui luangin min nghak lo' an tihte hi a dik khawp mai. Kan thianpa pakhat chuan, "Lunglen hnem tia hla kan ngaihthlakte hi kan lunglen tizualtu mai mai an ni." tiin a sawi thin a, ka pawmpui ta ngawt mai.

Ni e, tlang karah nitin ni alo chhuak a, kawlah min liamsan leh thin. 'He lei hi chatuan ram a tling lo...' tih hla kan sa fo thin a, a dik zia chu kan hmangaihte zalna thlanmual hian an nemnghet. Kum tam fe liamtaa thil thleng kha nimin maia thleng angin kan ngai fo va, nunhlui ngaiin 'Kumhlui ding rih rawh' kan ti kum tin mai anih hi.

Arsenal fans tam zawkte pawhin 2003-2004 season kha an la hriatreng a rinawm a, an hrechhuak fo ang. Premier League-ah tlawm nei lovin season khat an hmang tluan zak a, HNEH THEIHLOH (INVINCIBLES) TEAM tia hriat an ni. Manchester City hian season khat chhunga point hmu hnem ber record an siam a, league-a champion hnem ber record dinglai erawh Manchester United siam ani thung.

Chelsea hian mahni khelmuala tlawm lo rei ber record an nei a, Liverpool hian khelh hmabak game sarih nei chungin league nomawi an chawi tawh bawk. City, United, Chelsea leh Liverpool sulhnu hi a ropui vek a, khum harsa tak tak turte pawh an ni. Arsenal record erawh a danglam nalh a khum thei awm tak ang maw? 2003-2004 season khan Premier League-ah an tlawm miah lova, game 26-ah chakin game 12-ah an tumpuite nen an inhnehtawk a, record ropui tak siam chungin nomawi an chawi.

                    HNEH THEIHLOH NUN NEITU

An hlawhtlinna kawngah khan 4-4-2 formation hmang tam ber mahse 4-2-3-1 ang pawhin a sawi theih a, striker leh midfielder-te inkarah Dennis Bergkamp a tlazep thin. Goal nawr ngaina leh goal khung pawh harsat lo tiin hriatlar ber an ni a, tlarhmaah Thierry Henry dahin an vung thei hle. Henry hian 2003 khan Pavel Nedved chiah tlukin loin Ballon d'Or a dawng teuh khawp mai a, 2004-ah Andriy Shevchenko, Deco leh Ronaldinho-te a tluk zo lo leh bawk.

France striker hlui hian tlarhmaah Bergkamp a dinpui a, Bergkamp hian a huntawp lam a hnaih ve tawh mahse a thiamna leh finna an chhawr tangkai hle. Veilam sirah goal khung thei Robert Pires a awm a, dinglam sirah player taima Freddie Ljungberg a awm ve bawk. Pires hian hemi season Premier League-ah hian goal 14 a khung a, Ljungberg hian goal li bakah midang pet goal tura siamsak vawinga a nei ve bawk.

Midfield-a an thluak bur ber chu Patrick Vieira niin team captain ani tel a, khelmualah dim leh hlauh hlauh a nei ngai lo. French midfielder hian Gilberto Silva dinpuiin an khawng thei khawp mai a, tlarhnung leh hma an pui tha thin hle.

Tlarhnung lamah kulh bang ang maia nghet leh tlo an kawl hnem a, su tlang thei pawh an tam lo. A laiah nghet takin Sol Campbell leh Kolo Toure an inkawp a, an sirah a hunlaia full-back tha pahnih Ashley Cole leh Lauren an awm ve bawk. An si ban nghaktu pawh Germany tana khel pha Jens Lehmann ani a, hemi season-ah hian goal 26 chiah an chhuah.

Player an neihthat vanga chetha chu ani teh meuh a, an inremkhawm dan a fuh tel tlat bawk. An khelh dan khan Barcelona ai mah chuan Atletico Madrid rawng a kai a, goal nawr chungin goal venhim an ngai pawimawh hmasa thin. Vieira leh Gilberto-te'n tlarhnung an pui tha a, Cole leh Lauren pawh an tlanchhuak tam lutuk lo. Full-back pahnih hian a hun taka tlarhma an pui thin a, goal venhim kawngah an thawhhlawk tel tho bawk.

Tlarhmaa awm Pires leh Ljungberg an tawlhkir hnem a, goal an neih theihna turin an tlanlet tam hle. Nawr turin player nei tha tawk mahse invenhim an ngai pawimawh a, an lama ball a awm laiin an nawrlet thut thin. Player ngal sang rual an nih avangin an nawrlet ana em em a, an hlawhchham khat viau bawk a ni.

                           TUNGE AN MANAGER?

Hneh theihloh Arsenal enkawltu hi Arsene Wenger ani a, pathluak tha leh fing tak a ni. An game hnuhnung bera Leicester City an hneh hnuah tlawm nei lovin Premier League season an hmang tluan a, Guardian writer Kevin Mitchell chuan Wenger hi Premier League-a manager fing ber tiin a dahsang hle.

French manager hian Gunners chiah a thlak danglam lova, English football hmel a thlak danglam thawk ani ber. Training dan thar a hmuchhuak tam a, player-te ei leh in thlengin a inrawlh. Manager dangte pawhin a kalphung hi an entawn nasa a, player-te'n an thatpui hle bawk. Champion an lawm tum pawhin dan khauh tak a siam a, beer bak in a phal lo.

Player lar sa nilo chherchhuah a thiam a, awm lo ata awmah a chantir thin ani ber mai. Toure lei nan £150,000 chiah a seng a, midfield-a khel thin hi centre-back tha taka a chhuah thei. Ljungberg lei nan pawh £3m chiah an seng a, team enkawl mai ni lovin sumdawn pawh a thiam hle. Sir Alex Ferguson hunlaia awm ni mahse a hlawhtling ve khawp mai a, Premier League vawithum bakah FA Cup vawisarih a chawi hman.

London hmar veng club hi 1996 leh 2018 inkar khan a chenchilh a, Premier League Manager of the Season chawimawina vawithum a dawng bawk. Arsenal a enkawl hma hian Monaco leh Nagoya Grampus a kaihruai a, zirna lamah pawh a thlengsang ve hle.

Monaco-a a awm lai hian Division 1 leh French Cup vawikhat veve a chawi a, Grampus hi Emperor's Cup leh Japanese Super Cup a chawipui bawk. A inkhelh ve lai chuan midfielder ani thin a, club pangaah a khel kual hman a ni.

MIMKUT THLA (SEPTEMBER)

 Kan chenna khawvelah hian, nipuiin thlasik tan hmun a ken a ṭul a, Lal thar piang kan lawm fel hnu lawkah kum hlui kan thlahliam ṭhin.

Engle khawle, kum thar lawmna ruai kan ṭheh fel chauh emaw tih laiin, 'Ber' thla zinga a hmasa ber alo ral leh ta ṭep mai a, hun leh tui luangin
min nghak lo an tih kha alo dik khawp mai. 'Ber' thla zinga hmasa ber September thla hi Mizo tawng chuan Mimkut thla a ni a, kohhran ṭhenkhatin Beihrual Thla tiin an sawi bawk.

Ni e, he thla hian ken tel pakhat a nei a, chu chu thlasik niin Tlaizawng par leh Tlangsam par kan hmu chho leh ṭep tawh. Thlaleh aṭang chuan 'Lal pian hun pangpar a vul leh ta' tih leh 'Kan khua' tihte a inchhawn chho leh zak zak dawn a, kan thawmhnaw lum neihte pawh kan hmutai leh ṭan ang.

Vawt tuar thei lo tan erawh hun sakei a ni leh ngei dawn a, in mite pawhin hun dang aiin an lem hnem leh dawn tih a chiang. Mi lungleng mi chuan PB Shelly kutchhuak, 'Ode to the west wind' tih kha kan hrechhuak furin a rinawm a, rilruin "O Wind, if winter comes, can spring be far behind" kan ti leh neuh neuh ang.

Inngaihzawnna lama lut rilte tan pawh thlasik hi a chimawm khawp mai a, 'I tel lova Krismas ka hmang tur hi' tih hla ngaina thar riau pawh an ther leh fur ang. Chatuan ram pana min kalsan tate pawh rilruah an rawn thar leh dawn a, fam rolung mualte pawh kan cheimawi leh hlawm viauin a rinawm.

Tumkawn tlang kan han chuangchhuak ang a, kan hmangaihte zalna mawitu Tlaizawng Par alo vul leh chuk ang. A kianga hnim chi hrang hrangin Lal thar lo piang tur an hmuak veleh dawn a, thlasik tina pawnpui tah tum ziah Laikingte pawh an lo ri leh rak rak ang.

Damzel phei pawh kum dang angin bawkin a vawt phei leh vur dawn a, Falkawn thlen thuai thuai a chakawm leh dawn khawp mai. Ram lama awmte an inpuahchah nasat ang bawkin, khawchhunga cheng mihringte pawh kan in buatsaih nasa leh dawn a, in leh a vel chei mawiin hunpui kan nghak ang a, bazara common deuh deuhte pawh an awm leh ngei dawn tih a chiang.

Zing kar aṭangin nilum kan ai leh ṭhap dawn a, a tla tur kan thlahlel leh ngawi ngawih bawk ang. He thlasik lo thleng tur hian chhawm tel a ngah dawn a, kum tluana kan dah ṭhat Sikri pawh rilruah a rawn thar leh ṭep tawh. Tui sik ngata inbual ṭhinte insawitheih hun pawh kan hmuak tel a, sapho 'Winter' zet hi chuan ken tel ava ngah tehlul em!

Zingkarah ṭiau chhumin hmun hniam lam a bawh paw leh chuk ang a, nipui lai pawha tho hma peih chuang lote'n an mut rei chhanah khawvawt an rawn chhuanlam leh hmiah ang. Zan lamah vawtin min hmet chho leh dawn a, alo thlen tak tak hmain lo in buatsaih nasa rawh.

Amah Mafaa tih dan takah, khum laizawl leh lirtheia chesual an awm leh nuk dawn a, thlarau mite tan erawh Biak In leh zaikhawmna in thlakhlelh hunlai tak a ni thung ang. Thlasik lo thleng tur hian hunpui a rawng kengtel dawn a, kan hman chhan hre lo leka khawsa an tam leh dawn khawp mai.

Kan thil tih mil zela lawmman dawng tur kan nih avangin fimkhur ila, vanrama chhawm loh tur thilah buai vak a hun tawh lo. Nikum (2022) khan FIFA World Cup avangin Qatar-ah kan cham rei deuh a, kuminah erawh Bethlehem thleng hmasa pawl nih ṭheuh kan tum dawn nia.